ni'o la karyn. goi ko'a jdice ledu'u le ko'a za'i mabla cinmo cu se srana lenu la milyr. catra vo'a za le prulamjeftu .iku'i leza'i djuno na sidju fi lenu vimcu le to'e satci za'i terpa noi menli vanbi ko'a .i ti bebna .i lenu la milyr. morsi cu na srana ko'a .iku'i ki'u ma le plana je gleki nanmu pu catra vo'a .i lei tcini be la milyr. cu mukti leza'i jmive .imu'a le speni .e le verba .e le xamgu jibri .e lei se manci se ricfu pe lezi cedra .i .u'e mu'i ma my. gasnu
ni'o lu coi doi dirba li'u se cusku le fetspe be la karyn. ca lenu ko'a zutse vi le jubme
.i xi ky. lu coi la titlas. .i coi la bilis. li'u .i le bersa cu bacru da
ni'o do na ka'e jijnu fi lo prenu sei la karyn. jinvi .i ko'a sazri cpedu tu'a le ko'a cersai .i le sanmi cu melbi ke se finti ce'o se sabji le cnino me la .avinion.dikcas.jmijukpas.
ni'o leza'i ko'a mabla cinmo cu ranji .i la'edi'u fanza mu'i lenu la karyn. djica leza'i gleki je jundi kei ze'a lezi cerna .i ti surla djedi .ije le jdini catni pe la .avinion.dikcas. baza klama .i ti vajni djedi
ni'o ko'a joi le bersa cu klama le vorme
.i xi ky. lu .a'o zabna le djedi doi bilis. li'u .i le bersa cu sirsedysligau gi'e cpacu lei cukta gi'e co'a klama le ckule secau lonu cusku .i la karyn. pensi lejei da raktu la bilis. .i ko'a pacna lenu ra jitfa .i su'epa lo se lanzu poi ta'e xanka cu banzu
ni'o lu co'o doi titlas. li'u .i ko'a cinba le fetspe goi ko'i pu'o lenu ko'i cliva tezu'e lenu te vecnu .i lu do'anai ta gleki li'u se ke pensi cusku ko'a ca lenu catlu lenu ko'i cadzu le pluta .i ko'a pensi leni ba ve vecnu fi ko'i ve'a le .abu.dy. zarci .i lenu catlu le junla cu ve cilre ledu'u le .abu.dy. jdini catni cu klama ba lo mentu be li cino .i lenu jinru catra cu xagrai tadji lenu vimcu leza'i xlali cinmo .i ko'a pensi cusku di'u gi'e klama le lumku'a
ni'o le lumku'a cu minra slasi banli .ije lepo'o ka kufra cu rinka leza'i ko'a surla .i ko'a renro lei taxfu le .abu.dy. zmiku me la ji'in.da'egaus. gi'e tikygau leka carvi danre kei tu'a lo jipno poi zmadu zo sutra li pa .i lei djacu noi milxe zmadu leka glare kei le skapi cu darxi le cinla ke blaci xadni .i .uisai .i za'umai lenu surla ke sudga satre kei ne'i le .abu.dy. me la zmikus.sudgaubu'us. .i lu traji be leka se zdile li'u se ke pensi cusku ko'a ca lenu le sudgaubu'u cu tengau je satre lei ka skori kei sluji .iji'a ti bilga lenu se zdile kei sei ko'a mojgau cusku vo'a .i le .abu.dy. me la zmikus.sudgaubu'us. joi lei cabra be lonu krevi'u cu se vecnu fo lo rupnu be li cipamu ku joi lo cteki .iku'i .o'u piro le jdima cu vamji sei ko'a jdice ca lenu le .abu.dy. krevi'u cu klama fi lo kojna gi'e sutra vimcu lei tordu kerfa be ko'a .i paunai ma krinu leza'i jmive kei secau lenu do se zdile tu'a lei se ricfu
ni'o tu'a le skapi cu pluka se cortu ca lenu la zmikus.sudgaubu'us. sisti .i zo'e ta'e mukti leza'i mutce be leka se pluka .iku'i ko'a na co'e .i lenu la milyr. catra vo'a cu fanza le ko'a menli gi'e daspo leza'i panpi pe le surla djedi .i xu tu'a lo drata cu raktu ko'a .iju'o noda nabmi fi tu'a le zdani .i lei ko'a papri cu se ganzu gi'e bredi tu'a le jdini catni .i lu xu mi co'i morji da sei ko'a voksa cusku li'u
.i lu le jdini catni pe la .avinion.dikcas. zvati ba lo mentu be li pamu li'u se ke smaji cusku le .abu.dy. me la mudrimojgaus.
.i xi ky. lu mi djuno la'edi'u .i xu su'oda drata li'u
.i la mudrimojgaus. tcidu lei morji datni noi barda liste le'i notci be lonu kurji le purdi keiku ce lonu gau cipra fi la jetce bikla keiku ce lonu te vecnu lo rectu ne le pavdei. keiku ce le simsa .i lo se gunka poi ko'a nu'o gasnu .i xi ky. lu je'e do'u ti banzu li'u .i ko'a curmi lenu ko'a dasni gau le .abu.dy. me la zmikus.taxsabjin. .i gau zy.ty.sy. noi certu ku'o le bongu tunta xadni cu se snuji fi lei cnino bukpu .i ba lenu bumru lei misno je nakni pukpanlitki kei tu'a ko'a cu mulno .i ko'a klama le barda kumfa fo lo jbini be lei sazri poi lamji ro le mudri .i lenu sutra catlu lei ckilu ne le mudri cu ve cilre ledu'u le tcini be le zdani cu drani .i lei palta ne le cersai ba'o se lumci je se ganzu .i le zdani cu jinsa je se spali .i lei taxfu pe le fetspe cu dandu .i lei jakne se kelci pe le bersa ba'o se xruti tu'a le socku'a .i lu ko sisti lenu se raktu doi terpa li'u se ke fengu cusku ko'a ko'a
ni'o le vrogai cu cusku lu la naun.patys. pe la .avinion.jdinis. cu zvati ti li'u .i la karyn. co'a minde le vrogai lenu kalri kei pu lenu ko'a zgana la zmiku barjyse'u .i .ii ki'u ma ko'a na pensi tu'a ta .i la zmiku barjyse'u goi fo'a cu se zbasu la kastil.matran. .i ko'a pu te vecnu fo'a fi'o tcini lonu se xlura .i .abu.dy. na'e zanru tu'a fo'a mu'i leza'i .abu.dy. vecnu le simsa
ni'o gau ko'a la barjyse'u cu gunro muvdu le jupku'a .i ko'a minde le vrogai lenu kalri .i lu coi doi naun. .i .a'o xamgu be do djedi li'u se cusku la patys. goi ko'o .i la patys. cu rajycla je banli nanmu gi'e dasni le junri ke sunla pastu .i lei skuro kojna be lei kanla cu sinxa leka di'i cmila .i ko'o ganra cisma gi'e jgari le xance be la karyn. ca lenu ru'u catlu le vasru be so'ida kumfa .i xi py. lu ti mutce be leka melbi doi naun. .i melbi .ui .ije'u pe'i lei kagni javni cu curmi lenu mi cusku le sedu'u le do zdani nenri cu traji leka pluka kei fo le vi pagbu li'u .i la karyn. co'a jgira mu'i la'edi'u gi'e pensi lei linji girzu be leka mintu bei lo zdani be'o poi se stuzi le vi lajypau .a le lamji .a le lamji be ri .i lu .e'e xu rozo'e to'e spofu sei la patys. noi punji le tanxe le stizu cu reisku .i xu rozo'e drani li'u
.i lu .ie go'i sei la karyn. gleki cusku .i la .avinion.dikcas. ze'e na spofu li'u
.i xi py. lu xu le fonxa cu xamgu .i xu cenba tu'a lo vreji di'i piro lo cacra be li paze li'u
.i lu ju'o fy. go'i li'u se cusku la karyn. .i ko'a noroi pilno le fonxa noi ku'i melbi nilce
.i xi py. lu xu le ve tivni pe la sligus. cu xamgu .i xu do'o se zdile tu'a lei se tivni li'u
.i xi ky. lu .uisai prane leka te benji li'u .i ko'a te jarco fi lenu se tivni kei pu lo masti .ije lenu ra simlu leka zasti cu spaji
.i xi py. lu le jupku'a cu mo .i xu la zmiku jukpa cu drani .i xu la terjukpa certu ca'o di'i zbasu li'u
.i xi ky. lu .iesai melbi cabra .i sa'u melbi li'u .i la patys. reisku fu le dujyca'a .e le sakyjistci .e le karce .e le vinji .e lei so'unonomei dacti poi la karyn. ba'o te vecnu fi la .avinion.dikcas. .i lu rozo'e xamgu li'u se cusku la karyn. .i la'edi'u milxe be leka jitfa kei ni'i ledu'u lezu'o ko'a vimcu lei tanxe be lei cabra cu na mulno .i lu sa'u se manci xamgu li'u
.i lu ju'o mi se pluka li'u se cusku la patys. noi vreta zutse gi'e cmoni befi leka rivbi cinmo .i xi py. lu do na djuno fi leni mi'a di'i troci lenu mansa lei te vecnu .i go lo se vecnu cu na'e drani gi ri se xruti secau lonu reisku .i .o'a mi'a se marde lesi'o pluka lei te vecnu pe mi'a li'u
.i xi ky. lu ki'e doi patys. do'u mi ju'o ckire li'u
ni'o la karyn. pacna na'ebo lenu le .abu.dy. se jibri cu cpedu lenu viska le jupku'a .i ko'a se xanri leza'i la zmiku barjyse'u pe la kastil.matran. cu zvati ta pa'a leda'i nu lo ratcu cu zvati lo gerku se tigni .i lu mi jgira cusku le sedu'u piso'a lei xabju be levi pagbu cu ta'e te vecnu fi mi'a sei la patys. ca'o cusku .i le kagni cu se lacri li'u
.i lu xu la naun.milyr. pu te vecnu fi do sei la karyn. reisku li'u
.i lu pau le prenu poi ke'a catra ke'a sei la patys. ze'i frumu .i my. go'e je'u .i ta cfipu mi doi naun. .i ju'o cfipu mi .i .u'e pu lo masti be li su'epaboi my. te vecnu fi mi fe lo cnino me la jetce bikla noi kakne lenu cacryki'otre li mumuno kei tu'a lo sirji .i my. pu gleki pa'a tu'a lo verba .ibabo .uesai my. gasnu ta .ije'u ki'u tu'a la jetce bikla le se dejni be my. cu zenba fi lo cmalu li'u
.i xi ky. lu ju'o go'i li'u
.i xi py. lu ku'i ta na vajni .i my. ponse piro le se ricfu pe le munje .ibabo my. dandu catra vo'a li'u
.i xi ky. lu xu my. dandu catra vo'a .ue li'u
.i xi py. lu go'i sei la patys. noi di'a frumu cu cusku .i piro le cnino sidju cu se vasru le zdani .ije my. catra vo'a tu'a lo spisa be lo skori .i la'a my. ze'u menli bilma li'u .i leza'i frumu cu sakli canci ba'i le tcaci za'i cisma .i lu ku'i dukse la'elu'ode'u .i .ui .e'o mi'o casnu do li'u .i leza'i cisma cu zenba leka ganra kei ca lenu la patys. kargau le tanxe .i lu .e'e le do janta zo'u do dejni mi'a lo rupnu be li renociki'o su'i pireso ca lemu'e do rore'u te vecnu doi naun.karyn. .i xu la'edi'u drani li'u
.i lu je'e drani li'u se cusku la karyn. noi morji leni se dejni kei fi'o sorcu le ko'a vreji .i lu ti se pleji pagbu li'u .i ko'a dunda le vasru la patys. noi catlu ra gi'e setca fi le daski
.i lu .i'o xamgu .i .e'e xu do djuno doi naun.karyn. ledu'u leni do jmive na banzu lenu do pleji piro lo rupnu be li renonoki'o .iepei li'u
.i lu .ie pe'i mi na co'e sei la karyn. junri cusku li'u .i tu'a ko'a cu nanca lipo'o ciso .i leza'i ko'a jmive cu ranji lo nanca be li panono ri'a lei se manci pe le ve mikce saske .iku'i ko'a noi jerna lo rupnu be li ciki'o lo nanca cu na kakne lenu mo'u pleji ku jo'e lenu sabji fi le lanzu
.i xi py. lu ju'o mi'a na'e djica lonu lebna lo sarcu do kei noi ta'o se curmi lei flalu poi mi'a sidju fi lenu finti je zanru ke'a .iji'a .uisai lei banli cnino poi co'a se vecnu ze'a le bavlamna'a .i lei dacti poi do na'e djica lenu claxu doi naun. li'u .i la karyn. sirsedysligau .i ju'o ko'a djica tu'a lo cnino se vecnu .i xi py. lu .e'e da'i mi'o bilga fi le tcaci .i go do curmi lenu dejni le se jerna be le bersa bei tu'a lo nanca be li cino gi mi'a se frili lenu jernu'e do li'u .i la patys. sutra to'e setca lei papri le tanxe gi'e fatri punji ra le jubme .i lu pe'u doi naun. do ciska fi ti. li'u
.i lu .o'i mi na birti sei la karyn. cusku .i mi djica lenu sidju le nanla kei .e na'ebo lenu gau mi ny. bilga .y. li'u
.i lu ta'a doi naun. sei la patys. dicra cusku ti te prali le do bersa ji'a .i paunai by. vive'i xabju .i drani fa leza'i by. ponse lei se ricfu no'u lei saske se manci li'u
.i lu je'e sei la karyn. cusku .i ku'i li'u
.i xi py. lu doi naun. lo'e prenu ca se tcini leka banli .i pu lo ctona'a le traji be leka ricfu na kakne lenu te vecnu fi da poi ro lo fadni cu ponse caku .i .e'u ko na pensi ledu'u ti dejni .i .io ti te zivle li'u
.i lu la'edi'u jetnu sei la karyn. senpi cusku li'u .i ko'a pensi tu'a le bersa ku jo'u lei jakne se kelci pe by. ku jo'u lei cartu be loi tarci .a loi plini .i lu xu ti drani li'u se ke pensi reisku ko'a ko'a
.i lu ma raktu sei la patys. gleki cusku li'u
.i lu .o'anai pe'i sei la karyn. cusku lenu dunda lei se jerna be le mi bersa .y. .i pe'ipei le go'i cu dukse li'u
.i lu .u'i dukse .i doi dirba nanmu do'u sei la patys. spoja cmila .i xu do slabu la melyn. poi xabju le jibni .i .i'i ko na cusku le sedu'u mi cusku di'e .i my. dejni lei se jerna be lei pazypanzi bei tu'a piro leza'i py. jmive .ije my. na ponse lo xadba be lei se vecnu poi my. jdice fi leza'i ponse ke'a .i .ei mi'a finti da tu'a my. .i lenu selfu le te vecnu cu jibri mi'a .ije mi'a certu le go'i li'u .i la karyn. jarco leka to'e birti .i lu .i ji'a ba'o lenu do cliva kei doi naun. piro zo'e cu se ponse le bersa li'u .i la'edi'u jetnu sei la karyn. pensi cusku .i le bersa ba ponse piro lei se manci dacti poi le zdani cu vasru .ije je'u lo nanca be li po'o cino cu cmalu pagbu lo jmive temci po'u lo nanca be li pamuno .i ko'a banli ciska .i lu .i'esai sei la patys. cusku .i ta'o xu le do zdani cu vasru le me la .abu.dy. turni sazri li'u .i na co'e .i la patys. cusku le sedu'u la turni sazri co'a se vecnu zi le cabna'a gi'e banli jarco leka saske zbaske .i ty.sy. se finti fi lezu'o jitro ro lo se gunka be lonu jisygau .e lonu jukpa kei secau lonu le ponse be ty.sy. cu muvdu .i xi py. lu lezu'o ru'i muvdu gi'e sazri lo batke troca'a cu se basti lepo'o nu do sazri pa lo troca'a .i .ui lo se manci se snada li'u .i ty.sy. se jdima lo rupnu be lipo'o mucimu .ija'ebo la karyn. ciska te vecnu pa ty.sy. gi'e jmina zo'e fi le se dejni be le bersa
.i lu lo drani cu drani sei ko'a noi kansa la patys. lenu klama le vorme cu pensi cusku .i ti poi zdani baze'u se ponse la bilis. .i go'i la bilis. joi le speni be by. .i ju'o ra ba djica leza'i roda cnino xamgu li'u .i lu .i tu'a pa lo troca'a sei ko'a pensi cusku .i .ui la'edi'u ju'osai sidju li'u
ni'o ba lenu la patys. cliva kei la karyn. zutse le stika kakne stizu gi'e sazri la solidon. .i ba lenu ko'a torni sazri la frilis.batket. kei ko'a facki ledu'u ko'a na djica lenu catlu ro le se tivni .i gau ko'a jdika leni jganu le stizu le loldi kei gi'e vreta .i le se sanji be ko'a ca'o raktu
ni'o lu coi doi dirba li'u .i ko'a co'a cikna gi'e facki ledu'u le fetspe cu zvati .i ko'i cinba ko'a le kerlo .i lu .ui ko catlu li'u .i ko'i ba'o te vecnu le .abu.dy. me la cinzenban. nerta'u .i ko'a cu se ke pluka spaji lenu facki ledu'u ko'i te vecnu ta po'o .i la lilys. ta'e bevri be lo tilju be'o xruti vo'a fo leza'i te vecnu .i lu .i'e ti melbi sei ko'a cusku li'u .i ko'i korcu tezu'e lenu cinba kei gi'e cmalu cmila cei broda to ko'i cilre fi le tcaci tu'a le cabna ke me la solidon. misno .i ko'a djica leza'i ko'i na broda toi .i ko'i cusku lu bazi sazri fi le vacysai li'u gi'e klama le jupku'a .i la karyn. cisma mu'i lenu pensi leza'i ko'i baza kakne lonu sazri fi tu'a lo sanmi secau lonu cliva le barda kumfa .i ko'a surla zutse le ko'a stizu .i le bersa goi ko'o cu nerkla .i lu ma tcini doi bersa sei ko'a gleki cusku li'u
.i lu lenu milxe sei la bilis. no'e gleki cusku li'u
.i xi ky. lu .a'u ma raktu doi bersa li'u .i le nanla cu catlu le jamfu ca leza'i na'e spuda .i lu .e'e ko skicu le nabmi la patfu li'u .i la bilis. zutse le tanxe gi'e punji le xedja lei xance .i ko'o pensi catlu le patfu
.i xi by. lu doi patfu do'u xu mi kakne lenu se jibri da pe la jatna cikre .ijo mi djica ra li'u .i la karyn. spuda le preti lenu cmila .i le se djica be la bilis. cu slilu fi le jakne gidva ku ce la jatna cikre .i lei cikre cu nobli .i le jibri pe le go'i cu zu'o cikre le zmiku ke cikre minji .i lei cikre minji ka'e cikre so'a da .i ku'i na cumki fa lenu lo minji cu cikre le minji poi cikre le minji .i ta se zukte lai jatna cikre .i ku'i le klesi cu mutce leka jivna .ije piso'u le traji be leka certu be'o besna ca'a se cnemu fo le kulpikta .i ji'a gu le nanla cu kakne gi ko'o na simlu leka stati le zbaske
.i xi ky. lu ta cumki doi bersa .i roda cumki li'u
.i xi by. lu ku'i ta cumki sera'a mi li'u
.i xi ky. lu mi na djuno li'u se cusku la karyn. noi troci leka stace
.i xi by. lu .y. mi na djica tu'a la jatna cikre .aunai li'u se cusku le nanla noi jimpe ledu'u lu na cumki li'u cu danfu .i lu mi djica leza'i jibri lezu'o kesmarce gidva li'u
.i lu .u'e lo kesmarce gidva doi bilis. sei la lilys. noi klama le kumfa cu cusku .i ku'i no ra zasti li'u
.i lu .ienai gy. zasti sei la bilis. darlu cusku .i mi te cusku ve'a le ckule le sedu'u le turni ba benji loi remna la vonplin. li'u
.i xi ky. lu ty. di'i cusku ta ze'a lo nanca be li panonoboi sei la karyn. cusku .ije ty. za'o na gasnu li'u
.i xi by. lu .ia ty. ca go'i li'u
.i lu mu'i ma do djica lenu klama la vonplin. sei la lilys. noi cmalu cisma fa'a la karyn. cu reisku .i no lo melbi nixli cu zvati la vonplin. li'u
.i xi by. lu mi na se cinri loi nixli .i mi djica le po'o nu klama la vonplin. li'u
.i xi ly. lu do na'e nelci vy. .i vy. to'e pluka je to'e citno stuzi gi'e se vacri noda li'u
.i lu vy. se vacri lo cmalu .i .a'o mi djica lenu klama vy.boi sei le nanla cu smaji fengu cusku .i mi na'e nelci leza'i zvati ti li'u
.i lu ke'o li'u se cusku la karyn. ca lenu sirji zutse .i lu xu do na ponse su'e da .i ma poi do djica li'u
.i xi by. lu na go'i doi naun. .i mi ponse ro da poi mi djica li'u .i la karyn. jinvi fo lonu le bersa cu pilno zo naun. kei fe ledu'u da nabmi
.i xi ky. lu .i'o doi bersa do'u ca leza'i mi simsa do leni nanca kei mi si'a djica lonu klama la vonplin. .i mi pu djica lonu gasnu lo banli .i .ue mi do'a djica leza'i mi me la jatna cikre li'u
.i xi by. lu ki'u ma do na pu co'e li'u
.i xi ky. lu mi pu co'a makcu .i mi pu jimpe ledu'u da zmadu leka vajni .i pamai mi bilga lenu pleji le se dejni poi mi cerda ke'a fi le patfu .ibabo mi penmi le do mamta sei la lilys. cmalu cmila .ije mi djica tu'a le zdani pe mi .i le lifri be do ba mintu .i do ba ba'o pleji le se dejni be do gi'e speni pa'a tu'a ma'a li'u .i la bilis. ze'a smaji .ibabo ko'o muvgau le xekri kerfa noi simsa le kerfa be le patfu leka sirji ku'o fo le mebri gi'e gau cilmo fa le ctebi
.i xi by. lu ki'u ma mi dejni doi naun. li'u .i la karyn. ke jundi ciksi ke'e cei broda .i broda tu'a le dacti poi lo lanzu cu nitcu ke'a leza'i to'e cilce jmive ku'o .e le jdima be ra .i broda leka tadji be lonu pleji .i broda leza'i tcaci fa lonu lo panzi cu cpacu lo pagbu be lo se dejni be lo rirni ca lonu py. makcu
ni'o leza'i la bilis. smaji cu fanza ko'a .i do'a le nanla simlu leka te fuzme .i .o'onai ko'a gunka sei ko'a pensi cusku se'u ze'a lo nanca be li so'i fi lenu sabji ro lei se ricfu le to'e ckire bebna .i lu doi bersa do'u sei ko'a jursa cusku se'u xu do tadni lo citri vi le ckule .i .i'a go'i .ija'ebo do djuno fi le pu tcini .i lei nu jamna .i .ionai xu do nelci lonu do spoja ca lonu jamna li'u .i le nanla na spuda .i lu .ija xu do nelci lozu'o cortu be le cutne be'o gunka ze'a lo cacra be li bi .i gunka da poi lo minji cu kakne .ija do roroi xagji .ija do lenku gi'e se darxi fi lo carvi gi'e na ponse lo marbi li'u .i ko'a denpa lonu spuda kei gi'e na cpacu gi'e ve denpa .i lu do jmive ze'a le cedra poi traji leka zanselfu'a kei fo lu'i da poi te djuno fi loi remna .i do sruri piro lo larcu ja saske se manri .i le xagrai fo le'i zgike .e le xagrai fo le'i cukta .a le'i larcu cu se sabji fi do .i banzu fa lonu do sazri lo batke troca'a li'u .i ko'a zenba leka xendo cusku .i lu xu do pensi ma li'u
.i lu po'o mi pensi lejei mi kakne lenu klama la vonplin. sei le nanla cu cusku .i sa'e go'i va'o leza'i mi dejni .i .a'onai mi jinvi ledu'u mi ba na'e rivbi ra li'u
.i xi ky. lu ju'o go'i li'u
.i xi by. lu cumki fa lonu mi mipri vo'a ve'i lo jakne li'u
.i xi ky. lu ku'i do .i'u na gasnu la'edi'u li'u
.i lu ju'o go'i li'u se cusku la bilis. .i ku'i lenu spuda cu claxu leka cinmo
.i lu do stali ti gi'e ba speni lo mutce be leka pluka be'o nixli li'u se cusku la lilys. ko'o
.i lu .ie mi go'i sei la bilis. cusku .i vi'o li'u .i suksa fa lenu ko'o cisma .i lu .ainai mi na junri de'u ne lonu klama la vonplin .i ju'o na junri li'u
.i lu mi gleki la'edi'u li'u te spuda fi la lilys.
.i lu .e'o ko co'i morji fi lenu mi tavla fi zo'e li'u se cusku la bilis. noi cisma sekai leka tinsa .i ko'o sanli gi'e bajykla le gapru fo le serti
.i lu la'a by. cliva tezu'e lenu kelci lei jakne sei la lilys. cusku .i .iu ju'o by. cmalu crida li'u
ni'o lai karyn. citka le vacysai va'o leza'i smaji .ibabo tcika lenu la naun.karyn. klama le briju .i ko'a nicte jibri ze'a lezi masti .i ko'a cliva rinsa cinba le fetspe gi'e klama le nenri be la jetce bikla gi'e savru klama le fanri .i le zmiku vrogai cu slabu ko'a gi'e gau kalri vo'a .i ko'a ma'esrogau gi'e cadzu nerkla .i lo zmiku ke carna guska tutci .e lo zmiku ke danre tucti zo'u roda zmiku .i le fanri cu barda gi'e se gusni .i lei minji cu smaji ga'ormolsa'a fi vo'a ca lezu'o xamgu se jibri le steci .i la karyn. klama le fanmo be le taflumca'a ke zbasu pruce linji tezu'e lenu basti le ne ra prenu .i lu xu roda xamgu sei ko'a reisku li'u
.i lu go'i sei le prenu cu cusku .i no zo'e to'e xamgu ze'a lezi nanca .i levi cnino se zbasu cu se voksa .i ri na'e jarco ta'i lonu te gusni kei pa'a lei to'e cnino li'u .i la karyn. zutse da poi le prenu pu zutse gi'e denpa lenu pa lo taflumca'a cu klama .i le jibri be ko'a cu traji be leka sampu .i ko'a ru'i zutse ca lenu lei cabra goi ko'u cu zo'a klama .i ko'a sazri lo troca'a be ko'u tezu'e lenu cipra leka drani .i ko'u roroi drani .i ba lenu cliva ko'a kei lei taflumca'a cu muvdu le bakfu pruce pagbu
ni'o le pamoi taflumca'a cu sakli klama fu le clani ke gunro pluta .i ko'a sazri le cfari ke batke troca'a bevi le mlana .i lu bredi lenu lumci sei le taflumca'a goi ko'e cu cusku li'u .i la karyn. sazri le troca'a befi lonu sisti kei gi'e curmi lenu ko'e cliva
ni'o leva nanla pe mi sei la karyn. pensi cusku .i xu by. ba makcu gi'e tugni fi lei se fuzme be by. .i xu by. ba makcu gi'e tugni fi le jikca se bilga be by. .i la karyn. senpi la'edi'u .i le nanla cu se jinzi leka fapro .i .i'ecu'i fi'o tcini lonu da snada tu'a la vonplin. kei da du le panzi be ko'a .iku'i lenu se pensi la'edi'u cu no'e raktu ko'a
ni'o lu bredi lenu lumci li'u .i lo za'umoi cabra zo'a muvdu
ni'o la karyn. morji da la milyr. goi fo'i .i le gleki nanmu di'i tavla fi lei plini gi'e di'i xalbo lonu rivbi klama cei brode tezu'e lonu cilce jmive .i fo'i na'e brode ku'i .i fo'i catra fo'i
ni'o lu bredi lenu lumci li'u .i ko'a sazri le sisti troca'a .i lu bredi lenu lumci li'u .i le menli pe la karyn. na'e jundi le jibri noi ju'o na se sarcu leza'i jundi .i ko'a djica lenu ko'a pu gasnu da poi ko'a djica ze'a leza'i citno .i banli fa lenu gunka lezu'o jakne gidva .i .ui banli fa lonu sazri lo batke troca'a gi'e klama la vonplin.
Copyright note: As far as I know, Cost of Living is in the public domain. The transcribers of the Project Gutenberg version state: “Extensive research did not uncover any evidence that the U.S. copyright on this publication was renewed.”
ti cipi'epa vreji / Version 3.1
© 2024 Wolfgang Corcoran-Mathe. Released under the terms of the Creative Commons Attribution 4.0 International license.