Note: For readability, lines of dialogue are broken up with newlines, as in English prose. I don't use “ni'o” for this purpose; the lines are still part of the same Lojban “paragraph”. Subscripts attached to “.i” indicate who's saying what.
ni'o le rusko sonci goi ko'a cu xanka klama fo le se xrani cmana gi'e bredi bevri le cecla .i ko'a ru'u sutra catlu gi'e tance pencu le sudga ctebi .i le flira cu jdari .i di'inaiku ko'a tengau le se gacri xance gi'e satre lumci le cnebo lo xasne gi'e mo'ini'a catke le karli
ni'o la .erik. goi ko'i carna fi la jitros.leones. goi ko'o .i lu xu do djica tu'a ta .ija xu do curmi lenu mi co'e ta li'u .i ko'i jai stika le lenjo ja'e lenu le flira pe le rusko cu se culno le manri .i lei linji cu kruca le ko'a jdari je junri flira .i la leones. pensi .i le rusko va sutra klama .i jibni lezu'o bajra .i lu ko na'e cecla .i ko denpa sei la leones. trati .ipe'i tu'a mi'o na'e se nitcu li'u
ni'o le rusko cu zenba leka sutra gi'e tikpa vimcu loi fagyfesti .e lo derxi be lo festi le ko'a pluta .i ko'a snada le galrai pe le cmana gi'e sisti ca lenu carmi vasxu gi'e ru'u catlu .i dilnu gacri lo tsani .i preja dilnu be lo grusi pulce .i so'u le lunbe stani be lo tricu fe'edi'inai tunta .i le loldi cu pinta gi'e lunbe gi'e se gacri le rokspi .i le dinju festi vi je va sanli tai le pelxu sedbo'u .i le rusko cu to'e surla .i ko'a sanji leza'i da to'e drani .i ko'a co'a mo'ini'a klama fi le cmana .icaku ko'a bi'i le badydi'u cu mitre li so'u
ni'o la .erik. co'a xanka muvdu .i ko'i kelci le xance cecla gi'e di'inai catlu la leones.
.i lu ko na'e dunku sei la leones. cusku .i ta ba fliba .i jy. kurji ta li'u
.i lu .o'unai xu do birti .i .ue ta ba'o klama le se mabla jibni li'u
.i lu jy. ta'e cando vi le badydi'u .i .a'a ta nerkla le xlali pagbu .i ju'i li'u
ni'o le rusko co'a bajra gi'e mo'ini'a sakli le cmana .i le cutci cu setca le derxi be lo grusi fagyfesti .i ko'a troci lenu le cecla cu gapru .i ko'a ze'i sisti gi'e lafmuvgau le reldarvistci le flira
ni'o lu ta catlu mi'o li'u se cusku la .erik.
ni'o le rusko di'a klama .i ko'i .e ko'o viska le kanla noi simsa re le blanu rokspi .i le moklu ve'i kalri .i ko'a na'e se firkrevi'u .i le xedja cu milxe leka se kerfa .i pa le mlana be le flira cu se barna le kurfa boxfo be le snipa dasri vu'o noi blanu vi le korbi .i barna befi lo mledi .i le ko'a kosta cu to'e jinsa gi'e se xrani .i pa le gluta cu se cirko .i lezu'o bajra cu rinka lenu le befsri terga'eca'a cu desku slilu re'o ko'a
ni'o la leones. pencu le birka be la .erik. i lu .i .ua pa jy. klama li'u
ni'o da poi cmalu gi'e jinme cu klama fo le loldi gi'e minra lo kandi solgu'i pe lo mijdo'i .i jinme bolci .i ta goi ko'u sutra klama fo le cmana fa'a le rusko tai lenu le gurclupa cu sutra carna .i ko'u cmalu .i cmima le'i cifnu be jy. i tcena fa le ko'u jgalu no'u re le kinli tunta noi carna tai le kalsa muvdu gunma be lo blabi gasta .i le rusko cu tirna tu'a ko'u .i ko'a sutra carna ca lenu cecla .i le bolci cu spoja lei pulce .iku'i le remoi cu to'e canci gi'e klama fo zo'e pe ko'u .i le rusko za'uroi cecla .i le cimoi bolci cu plipe le tuple pe ko'a .i ra se ke jinme sance gi'e plipe le janco .i le carna balre cu canci mo'ine'i le galxe be le rusko
ni'o la .erik. surla .i lu .uo .iisai le va se mabla dacti cu se terpa mi .i mi ru'inai jinvi ledu'u le purci cu xauzma mi'o li'u
.i xi ly. lu gu lei rusko ka'e finti jy. gi mi'o go'i li'u .i la leones. cu jelgau le sigja sekai leka desku .i lu .u'e ki'u ma le rusko cu vu klama ti sekai leka zi'o kansa .iza'a noda pu bandu ta li'u
ni'o la skat. poi pavmoija'a cu mo'iga'u sakli klama fo le nitytu'u fe le badydi'u .i lu ma fasnu .i da pu zvati le vidni li'u
.i xi ly. lu la .ivan. co'e li'u
.i xi sy. lu xu pamei li'u
.i la .erik. bevri le vidni .i la skat. catlu ri .icaku so'i le jinme bolci cu cpare le vreta xadni .i lei kandi jinme bolci noi smaji sance cu katna le rusko le cmalu poi se bevri .i lu .u'e so'i la jgalu sei la skat. smaji cusku li'u
.i xi .ebu lu ta klama pa'a tu'a loi sfani .iza'a ca mo'amei le'i se kalte be jy. li'u
.i la skat. to'o catke le jvinu sekai leka se rigni .i lu tai tu'a loi sfani .i .u'e ki'u ma ta pu bartu .i ry. djuno ledu'u la jgalu cu sruri li'u
ni'o le minji poi zmadu leka barda cu ba'o klama le cmalu bolci .i le go'i noi clani ke punli tubnu zi'e noi se kanla le tunta cu jitro le se gasnu .i na'ebo piso'o le sonci cu ve vimcu .i da poi ve vimcu ca'o se bevri lai jgalu le dizlo befi le cmana
ni'o lu doi naun. li'u se cusku la leones. i lu pe'u do'u mi djica lenu klama le bartu gi'e catlu ta li'u
.i xi sy. lu ki'u ma li'u
.i xi ly. lu la'aru'e ta bevri da li'u
.i la skat. pensi .i sy. jangalgau .i lu je'e do'u ku'i ko jundi li'u
.i xi ly. lu mi bevri le mi ckiku li'u .i ko'o satre le djine be le jinme poi se dasni vi le xanterjo'e .i xi ly. lu mi ba bartu le korbi li'u
ni'o ko'o crepu le cecla gi'e mo'iga'u jundi klama le moklu be le badydi'u fo le jbini be lo bliku be lo xumrkonkreto be'o .e lo gasta tunta noi korcu .i le vacri ga'u lenku .i ko'o co'a klama fo le loldi fe le xadni be le sonci ta'i lezu'o cadzu le ranti fagyfesti .i le brife cu se flecu fi ko'o .iseri'abo le grusi pulce cu preja le flira .i gau ko'o gacri le kanla gi'e ca'o klama .i la jgalu cu xruti ca lenu ko'o jbikla .i so'o le go'i co'a tinsa sekai leka to'e muvdu .i ko'o pencu le ckiku .ipe'i la .aivan. pu da'i pleji so'i zo'e fo ta .i le tordu je carmi poi se dirce le ckiku cu dicra tu'a la jgalu gi'e jai galfi jy. leka spofu .ido'a le barda minji pe le kanla stani cu sinma ke xruti klama fi ko'o .i ko'o korcu vi le xadni be le sonci .i le se dasni xance cu tagji ganlo .i da nenri ri .i la leones. bapli kargau le degji .i botpi befi lo jinmrmalume .i minra .i ko'o setca ra le daski gi'e klama le badydi'u .i ti'a ko'o la jgalu cu xruti fi leza'i zukte gi'e co'a muvdu .i lenu porsi muvdu cu ve denpa .i le jinme bolci noi bevri cu klama fo le grusi fagyfesti .i ko'o tirna lonu le gurclupa cu sraku le loldi .i ko'o terpa desku
ni'o la skat. jundi catlu lenu ko'o cpacu le minra tubnu goi fo'e le daski .i lu xu ry. pu bevri ta li'u
.i xi ly. lu go'i bu'u le xance li'u .i la leones. vimcu le gacri .i lu .e'o ga'inai ko catlu ti doi naun. li'u .i la skat. cpacu fo'e .i ko'u punji le se sorcu le xance .i cmalu spisa le silka pelji .i cnici leka polje .i ko'u zutse vi le te gusni gi'e to'e jai polje le go'i
.i lu ma se ciska fi ti doi naun. li'u se cusku la .erik. i so'o le sonralju cu klama ti fo le nitytu'u .i la cibmoij.xendriks. goi ko'a to'e canci
.i lu doi cibmoij. sei la skat. cusku ko viska ti li'u
.i la xendriks. tcidu fi le pelji .i lu xu ti puzi ba'o se benji li'u
.i xi sy. lu pa le notci bajra puzi co'e li'u
.i lu ri zvati ma li'u se ke junri cusku la xendriks.
.i xi sy. lu la jgalu cu kavbu li'u
.i la cibmoij.xendriks. cmoni .i xi xy. lu ko cpacu li'u .i ko'a dunda le pelji le kansa
.i xi xy. lu mi jinvi ledu'u tu'a ti du da poi mi'o denpa .iju'o ry. masno tu'a ti li'u
.i lu .e'e ry. djica lenu casnu lo tigni sei la skat. cusku
.i xu ma'a ba penmi tu li'u
.i xi xy. lu la'e di'u na'e te jdice fi mi'o li'u .i la xendriks. zutse .i lu le benji sonralju cu zvati ma .i mi djica tu'a le lunra jemyzda li'u
ni'o la leones. pensi ca lenu le benji sonralju cu jundi jai lafti le bartu bonmaksi .i ra sisku leka sinxa lo rusko ke zgana marce kei le tsani be le badydi'u
no'i lu doi naun. sei la skat. cusku be la xendriks. iju'o cizra fa lenu tu co'a friti .i ma'a pilno la jgalu puze'a lo nanca be li ji'i pa .i .u'e caku tu co'a randa li'u
.i xi xy. lu la'aru'e la jgalu co'a di'i nerkla le tu badydi'u li'u
.i lu pa le barda poi cmima le'i se stani cu nerkla le me la .aivan. badydi'u ze'a le prulamjeftu sei la .erik. cusku .i le go'i pu catra lo bende be tu pu'o lenu le tu gacri cu ganlo li'u
.i xi xy. lu do djuno fo ma li'u
.i xi .ebu lu le pendo cu skicu fi mi .i ru bevri fi le trixe fe le .y. spisa li'u
ni'o lu ta'a lunra jemyzda doi naun. do'u sei le benji sonralju cu cusku li'u .i le flira be le lunra zgana goi fo'i cu to'e canci le vidni .i le manfyta'u cu frica vo'a pe le badydi'u leka cnici .ije fo'i to'e se kerfa fi le flira .i lu lunra jemyzda re'i li'u
.i xi xy. lu ti crane jitro me'e la lys.siclus. zi le terdi .i ko curmi lenu mi tavla la tamsan. poi zelmoija'a li'u
.i le vidni cu manku .i baziku le rotsu flira be la zelmoij.tamsan. cu se lenjo .i xi ty. lu re'i doi cibmoij. li'u
.i xi xy. lu la jgalu pe ma'a ba'o catra pa lo rusko bajra poi bevri lo notci .i mi'o na'e jdice fi lenu zukte mu'i tu'a ra .i le simsa be ti pu tcica li'u
.i xi ty. lu notci ma li'u
.i lu lei rusko cu djica lenu ma'a benji pa lo sonralju poi cmima lo jansu jdice gradu ku'o le korbi pe ry. i zukte fi lenu casnu .i ry. na'e skicu le se srana be lenu casnu .i ry. cusku lesedu'u cuntu sei se dicra li'u .i ko'a tadni le pelji .i lu .i le cuntu poi junri vajni cu krinu lenu co'a casnu fa lo jansu be la .ubus.nys. ku joi ry. li'u .i ko'a punji le notci re'o le vidni tezu'e lenu le zelmoija'a cu tcidu .i le kanla be la tamsan. cu slilu
.i lu .e'o ma se zukte mi'o sei la xendriks. reisku li'u
.i xi ty. lu ko benji lo prenu tu li'u
.i xi xy. lu xu do na'e jinvi ledu'u ti nu tcica li'u
.i xi ty. lu cumki .iku'i le judri be le ry. crane jemyzda be'o poi se benji ry. cu drani .i .i'a lenu troci cu se vamji do'anai li'u
.i xi xy. lu mi ba benji lo sonralju le bartu gi'e skicu le jalge do bazi lenu ru xruti li'u
.i xi ty. lu je'e doi cibmoij. li'u .i la tamsan. sisti leza'i benji .i le vidni cu morsi .i ga'uku le bonmasksi cu masno muvdu lo dizlo
ni'o gau la xendriks. polje le pelji le sarlu .i ko'a mutce leka pensi i lu .e'u mi klama sei la leones. cusku li'u
.i xi xy. lu .ienai tu djica tu'a lo cmima be le jansu jdice gradu li'u .i la xendriks. satre le xedja .i lu .i .a'a jansu jdice gradu .i mi na'e bartu ze'a lo masti be li so'o .i la'a lenu vasxu lo bartu cu xamgu mi li'u
.i xi ly. lu pe'ipei ta ckape li'u
.i la xendriks. lafmuvgau le viska tutci gi'e pilno ri .i le xadni be le rusko ba'o canci .i pa po'o la jgalu cu se viska .i ri ca'o polgau vo'a gi'e canci mo'ine'i le fagyfesti pa'a tu'a le xasyjukni .ike'u simsa tu'a le rigni ke jinme xasyjukni .i xi xy. lu ta po'o raktu mi li'u .i la xendriks. satre le xanterjo'e .i lu mi djuno ledu'u mi snura gi'o bevri ti .iku'i .ii jy. ckaji da .i mi xebni le se mabla .i mi djica leza'i ma'a na'e finti ta .i da to'e se drani ta .i nalsti cmalu sei se dicra li'u
.i xi ly. lu va'o leza'i ma'a na'e finti ta kei lai .aivan. pu go'i li'u
.i la xendriks. mo'ito'o catke le viska tutci .i xi xy. lu ta'onai za'a tu'a jy. jinga le jamna .i .iaru'e la'edi'u xamgu li'u
.i xi ly. lu za'a do co'a xanka da poi la .aivan. no'a li'u
.i la xendriks. catlu le xance junla .i xi xy. lu .ei go cfari fa lenu mi klama gi mi djica lenu snada tu pu le nicte li'u
ni'o ni'o la xendriks. goi ko'a vasxu gi'e bazi stapa klama le loldi noi grusi gi'e se pilka lo rokci .i ba lo mentu ko'a jelgau le sigja gi'e denpa fi leza'i ru'u catlu .i le tumla cu morsi .i noda muvdu .i ko'a ca'a viska va lo kiotre .i kuspe fa lo fagyfesti ku joi lo runme jinme ku joi lo dinju festi .i so'u lo tricu stani poi claxu lo pezli .e lo jimca .i ga'u ko'a le cimni gunro dilnu be le grusi cu preja ve'a la teras. bi'i le solri
ni'o la cibmoij.xendriks. to'o klama .i ri'uku cpare fa da poi bolci gi'e jinme .i la jgalu cu klama sekai leka sutra ku li'e de poi la'a cmalu danlu mu'u lo ratcu .i la jgalu di'i kavbu lo ratcu ji'a .i simsa lo ziljmina jibri
ni'o ko'a snada le galrai be le cmalu cmana gi'e pilno le reldarvistci .i le rusko korbi cu crane va le ki'otre be li so'u .i tu stuzi lo crane jemyzda be ry. i le bajra pu klama fi ra .i le tordu minji po le slilu birka cu klama zo'a ko'a .i le birka cu kucli muvdu .i my. panpi litru gi'e canci ni'a lei festi .i la xendriks. catlu lenu my. cliva .i ko'a puze'e na'e viska lu'a le klesi pe ta .i le'i klesi poi ko'a na'e slabu cu ca'o zenba .i le cnino befi leka klesi .e leka barda cu klama fi le lolni'a fanri
ni'o la xendriks. fagystigau le sigja gi'e klama .i cinri fa lesi'o pilno lo rutni jmive lonu jamna .i ta'i ma tu'a jy. cfari .i za'i sarcu .i pukiku le softo gugde ze'i mutce leka snada kei za lenu cfari .i la'edi'u kampu fi le'i jamna poi cfagau .i piso'i le bemro ba'o se daspo .ibazibo nu venfu ju'o .i le tsani cu culno le cukla bamvinji puzu lenu jamna cfari .i ra gapru puze'a lo nanca .i lenu le cukla co'a mo'ini'a sakli ve'a le rusko gugde cu balvi lenu la .uacinton. co'e kei za lo cacra be li so'u .iku'i le go'i na'e sidju la .uacinton. .i le truci'e pe le merko girzu cu muvdu le lunra jemyzda ze'aki le pamoi nanca .i li so'u ni te cuxna .i le ropno tumla ba'o canci .i festi derxi pa'u lo xekri cicyspa noi banro bu'u lo fagyfesti ku joi lo bongu .i piso'i le bemro tumla cu spofu .i noda kakne lepu'u banro .i no lo prenu cu kakne leza'i xabju .i so'u le megdo be lo prenu cu renvi ve'a le kadno tumla .e le ketco tumla .iku'i ze'aki le remoi nanca le falbu'u sonci be le softo co'a farlu .i lonu so'u le go'i cu co'e cu clira .ibabo zmadu ce'o zmadu .i ra dasni le se dirce bandu poi pamoi le'i plixau .i le ve vimcu befi le cupra ciste pe le merko gugde cu muvdu le lunra noi se zvati le truci'e .i po'o lei sonci goi fo'o na'e go'i .i fo'o poi ve vimcu cu stali ta'i lonu troci .i le so'u kilto vi co'e .i le bende va co'e .i noda djuno fi le se diklo be la'e lu'o de'u .i fo'o xabju da poi vo'a kakne tu'a ke'a .i fo'o ta'e litru ze'a lo nicte gi'e mipri ve'a lo dinju festi .a lo feskevlu'a .a lo lolnitku'a fi'o kansa lo ratcu .e lo since .iza'a le softo gugde pu'o jinga fo lenu jamna .i le so'o danti poi se cecla di'i lo djedi va le lunra cu po'o xarci sy.gy. i sy. zifre lonu litru .i lenu jamna kei tepi'o le fadni cu mulno .i noda vlipa lenu fapro sy.gy. .ibakibo le pamoi be la'i jgalu cu to'e canci .i ze'i lo djedi le se ckaji be lenu jamna cu cenba
ni'o la jgalu cu juxre ze'a le clira .i masno .i lezu'o lai .aivan. darxi jy. cu mintu fi leka sutra fe lezu'o jy. parkla fi lo lolni'a tubnu .iku'i jy. bazaki zenba leka kakne .e leka sutra .e leka certu lonu tcica .i lo fanri pe le terdi cu zbasu jy. i lo fanri vu lolni'a gi'e bancu le softo korbi .i lo fanri puzu zbasu le ratni danti noi ca to'e morji .i la jgalu cu zenba leka sutra kei gi'e zenba leka barda .i lo cnino klesi cu to'e canci .i so'o zo'e cu se pagbu lo te ganse jimca .i so'o zo'e vofli .i so'u le klesi cu ckaji leka plipe .i le certu pe le lunra cu platu .i jy. gau zenba leka pluja .e leka mapti cenba .i jy. binxo leka spaji .i lai .aivan. cu se nandu tu'a jy. i so'o le cmalu befi jy. co'a cilre fi lonu mipri vo'a ta'i lonu kakpa klama lo fagyfesti gi'e denpa .i jy. co'a nerkla lo rusko badydi'u ta'i lonu mo'ini'a klama ca loza'i lo gacri cu kalri tezu'e lonu vasxu .e lonu catlu .i pa lo jgalu poi nenri lo badydi'u zi'e poi se jicla bolci lo balre joi jinme zo'u ta banzu .i ba lonu paboi jy. cu nerkla kei lo drata cu jersi .ika'u ri'a tu'a le me jy. xarci le jamna bazi se fanmo .ila'aru'e ri puba'o se fanmo .ikiku la'aru'e ko'a bazi cpacu le nuzba .ila'aru'e la politburos. cu jdice fi lenu randa .i .uu lenu go'i cu lerci .i .oi lo nanca be li xa cu clani va'o lei ra'a tadji be lezu'o jamna .i le zmiku venfu cukla poi mo'ini'a carna klama ve'a le rusko tumla .i so'inonoki'omei zo'e .i le jurme krili .i le softo ke se gidva danti noi siclu ca lonu pagre lo vacri .i le linsi jbama .iji'a caku ti po'u le zukte minji .i la jgalu .i la jgalu na'e simsa le drata poi xarci .i jy. jmive ro le plixau .iju lei truci'e cu tugni ledu'u go'i .i jy. na'e zmiku .i jy. jmive gi'e carna gi'e cpare gi'e mo'iga'u desku klama fi lo grusi fagyfesti fe lo prenu gi'e cpare ri gi'e bikla fa'a le galxe .i la'e lu'o de'u se zukte jy. i le jy. jibri .i jy. snada le jibri .isu'anai le cnino poi mo'iga'u klama cu ca ze'i pu go'i .i caku jy. di'i cikre le sevzi .i jy. se'itru .i tu'a le dirce ckiku cu bandu le sonci be la .ubus.nys. iku'i va'o lenu lo prenu goi fo'o cu cirko le ckiku kei fo'o se kalte la jgalu .i le manfyta'u pe fo'o na vajni .i ni'a le terdi sefta lo zmiku minji cu prina cupra jy. .i loi remna vu rivbi .i dukse leka ckape .i noda djica leza'i jibni .i jy. na'e jai se fanza .i ju'o za'a jy. snada .i le cnino cu zmadu leka sutra .e leka pluja .i zmadu leka gunka certu .iza'a .u'e jy. ba'o jinga fo le jamna
ni'o la cibmoij.xendriks. jelgau le remoi sigja .i le tumji'u cu se badri ko'a .i ve'u fagyfesti gi'e dinju festi .i ko'a simlu leka zilpavykansa .e leka ce'upo'o renvi ve'a le terdi .iri'uku le festi be le tcadu cu sanli pa'u so'u le bitmu .e le derxi be le festi .i ko'a renro le morsi sacki gi'e zenba leka cadzu sutra .i suksa fa lenu ko'a sisti gi'e bikla lafmuvgau le cecla .i le xadni cu trati .iza'a ze'i simlu sei se dicra .i le trixe be le calku be le spofu dinju cu te klama ko'a le prenu noi masno dzukla .i cadzu sekai leka denpa .i la xendriks. kalgaisligau .i lu ko sisti li'u .i le nanla goi ko'i cu sisti .i la xendriks. dzimuvgau le cecla .i le nanla cu smaji sanli gi'e catlu ko'a .i ko'i cmalu gi'e citno .i la'a nanca be li bi .iku'i nandu fa lenu merli .i piso'e lo verba poi renvi cu xagji cmalu .i ko'i dasni le kandi blanu creka noi dertu se xrani .e le tordu palku .i le kerfa cu clani gi'e to'e jinsa se bakfu .i bunre kerfa .i le go'i cu dandu ca'e le flira ji'a ru'u lei kerlo .i ko'i bevri da sepi'o le birka
.i lu do bevri ma sei la xendriks. jursa cusku li'u
.i le nanla cu jarco .i da cribe se kelci .i le me la tedis. cribe .i le kanla be ko'i cu barda gi'eku'i na'e cusku
.i la xendriks. surla .i lu mi na djica ta .i ko ralte li'u
.i le nanla za'uroi birjai le cribe
.i lu do xabju ma sei la xendriks. cusku li'u
.i xi ny. lu nenri ta li'u
.i xi xy. lu xu le dinju festi li'u
.i xi ny. lu go'i li'u
.i xi xy. lu xu lolni'a li'u
.i xi ny. lu go'i li'u
.i xi xy. lu xomei li'u
.i xi ny. lu .y. xomei ki'a li'u
.i xi xy. lu ke'u xomei lu'i do'o .i xu le cecmu pe do'o cu barda li'u .i ko'i na spuda .i la xendriks. frumu .i lu .a'a xu do se kansa li'u .i ko'i stedu muvgau .i xi xy. lu ta'i ma do renvi li'u
.i xi ny. lu tu cidja li'u
.i xi xy. lu cidja le'a ma li'u
.i xi ny. lu le drata li'u
.i la xendriks. catlu ko'i .i lu tu'a do nanca ma li'u
.i xi ny. lu li paci li'u
.i la'e di'u na'e cumki .iku'i .u'e je'a go'i .i le nanla cu cinla gi'e tordu .iji'a la'a to'e ferti .iri'abo nu se dirce kei ze'a lo nanca be li so'i .i .uenai ko'i cmalu .i le birka .e le tuple cu simsa lei tubnu ke jinsa tutci .i bongu tunta gi'e cinla .i la xendriks. pencu le ko'i birka .i le skapi cu sudga gi'e rufsu .i se dirce skapi .i ko'a korcu gi'e catlu le ko'i flira .i ri na'e jarco leka cinmo .i le kanla cu barda .i barda je manku .i lu xu do ka'e viska sei la xendriks. cusku li'u
.i xi ny. lu go'i .i mi milxe leka viska li'u
.i xi xy. lu ta'i ma do rivbi tu'a la jgalu li'u
.i xi ny. lu la jgalu ki'a li'u
.i xi xy. lu le bolci dacti poi bajra gi'e kakpa klama li'u
.i xi ny. lu mi na'e jimpe li'u
.ila'a no la jgalu ve'a zvati .i so'i lo canlu cu snura .i ra ta'e jmaji lo sruri be lo badydi'u noi se zvati lo remna .i la jgalu cu se platu ckaji leka ganse leka glare .i lo glare pe lo jmive .i xi xy. lu do se xaurfu'a li'u .i la xendriks. sanli .i xi xy. lu .i .e'e do klama ma .i xu do xrukla .y. i xrukla tu li'u
.i xi ny. lu pe'u do'u mi kansa do li'u
.i xi xy. lu kansa mi .ue li'u .i gau la xendriks. simxu kruca fa lei birka .i xi xy. lu mi klama fo le clani .i ki'otre li so'o .i .ei mi sutra klama li'u .i ko'a catlu le junla .i xi xy. lu .ei mi ba'o klama pu le murse li'u
.i xi ny. lu .au mi kansa li'u
.i la xendriks. juxre sisku le'i se dakli .i xi xy. lu .e'anai na'e prali .i ko cpacu li'u .i ko'a renro punji le cidja lante .i lu ko lebna ti gi'e xrukla .iepei li'u .i le nanla na cusku
.i xi xy. lu mi ba xrukla fo ti ba lo djedi be li so'u .i go do ve'a zvati ti ca lenu mi xrukla gi .e'a do kansa be mi .iepei li'u
.i xi ny. lu .au mi kansa do caku li'u
.i xi xy. lu lenu cadzu cu clani li'u
.i xi ny. lu mi kakne lenu cadzu li'u
.i la xendriks. xanka muvdu .i lonu cecla gunta lei re cadzu cu dukse leka frili .iji'a tu'a le nanla cu rinka leza'i ko'a masno .iku'i la'aru'e ko'a xrukla fo na'ebo ti .ije va'oku le nanla ca'a mulno zilpavykansa sei se dicra .i xi xy. lu .ie ko kankla li'u
ni'o le nanla co'a re'o kankla ko'a .i la xendriks. cadzu .i le nanla cu smaji go'i gi'e jgari le me la tedis. cribe .i lu ma cmene do sei la xendriks. baki cusku li'u
.i xi ny. lu la davyd.eduard.derin. li'u
.i xi xy. lu la davyd. u'e .i ma .y. ma se lifri le mamta .e le patfu li'u
.i xi dy. lu zo'e morsi li'u
.i xi xy. lu ma rinka li'u
.i xi dy. lu lenu spoja li'u
.i xi xy. lu purci ma li'u
.i xi dy. lu lo nanca be li xa li'u
.i la xendriks. jdika leka sutra .i xi xy. lu xu do zilpavykansa ze'a lo nanca be li xa .u'e li'u
.i xi dy. lu na go'i .i le drata prenu cu puze'a co'e .i ri cliva li'u
.i xi xy. lu xu do zilpavykansa ba la'edi'u li'u
.i xi dy. lu go'i li'u
ni'o la xendriks. catlu ko'i .i le nanla cu cizra gi'e milxe leka tavla .i mipri leka cinmo .iku'i leka go'i cu se fadni ko'o goi lo verba poi pu ba'o renvi .i smaji .i to'e cinmo .i le cizra ke dimna sidbo cu jgari ko'o .i noda spaji .i ko'o panpi roda .i no lo fadni ja rarna stura be le'i marde .a le'i vanbi cu slabu ko'o .i le tcaci .e le kulnu .e le ckaji se bapli be leka cilre cu canci .ipo'o leza'i to'e menli lifri cu ve vimcu
ni'o lu xu dukse leka sutra sei la xendriks. cusku li'u
.i xi dy. lu na go'i li'u
.i xi xy. lu va'o ma do pu viska mi li'u
.i xi dy. lu mi pu denpa li'u
.i xi xy. lu denpa ki'a li'u .i la xendriks. cfipu .i lu do pu denpa ma li'u
.i xi dy. lu lonu kavbu da li'u
.i xi xy. lu kavbu ma li'u
.i xi dy. lu da se citka li'u
.i xi xy. lu je'e li'u .i la xendriks. frumu sekai leka junri .i le nanla be lo nanca be li paci cu renvi fi'o cidja lo cmalu mabru .e lo xadba fusra ke se lante cidja .i nenri lo kevna noi cnita lo daspo tcadu .i jbini lo dirce lalxu ku joi la jgalu .iji'a gapru fa lo rusko ke sfubu jbama noi litru lo tsani
ni'o lu mi'o klama ma sei la davyd. reisku li'u
.i xi xy. lu le rusko korbi li'u
.i xi dy. lu rusko ki'a li'u
.i xi xy. lu le bradi .i lei prenu poi cfagau lenu jamna .i ry. falcru le pamoi be le'i dirce jbama .i ry. cfagau tu'a roti li'u .i le nanla cu stedu muvdu .i le flira cu na'e jarco leka cinmo .i lu mi merko sei la xendriks. cusku li'u .i noda te spuda .i le remei ca'o klama .i la xendriks. vi crane .i la davyd. jersi gi'e bevri le to'e jinsa cribe re'o le cutne
ni'o ti'u li ji'i paxa ko'a .e ko'i sisti tezu'e lenu citka .i la xendriks. zbasu le fagri ne'i le kevna be le bliku be lo xumrkonkreto .i ko'a vimcu le cicyspa gi'e derxi crepu lo spisa be lo mudri .i le korbi pe le rusko na'e darno .i ko'a se sruri da noi pu ma'arbi'i zi'e noi pu se zvati lo grute tricu .e lo vanjba .i ca se zvati po'o le lunbe ricyzbe .e lei cmana voi kuspe le vu jipno be le ma'arbi'i .iji'a le dilnu be le se jicla fagyfesti cu preja ri'a tu'a le brife gi'e farlu le cicyspa .e le ve vimcu be le dinju .a le bitmu be'o .e da poi pu dargu .i la xendriks. jukpa le ckafi gi'e glagau le febvi jukpa ke lanme rectu .e le nanba .i xi xy. lu ko cpacu li'u .i ko'a dunda le nanba ku joi le rectu la davyd. i la davyd. zutse re'o le korbi be le fagri .i le cidni cu blaci gi'e jarco tu'a le bongu .i ko'i lanli lei cidja gi'e xruti dunda ri ca lenu desygau le stedu
.i xi dy. lu .aunai li'u
.i xi xy. lu .aunai ki'a .i xu do na'e djica tu'a ti li'u
.i xi dy. lu go'i li'u
.i la xendriks. jangalgau .i la'aru'e le nanla cu cenba leka jgina kei gi'e to'e fadni leka citka .i .a'ucu'i ca lenu ko'i xagji kei ko'i facki fi lo se citka .i le nanla cu cizra .iku'i so'i lenu cizra ca'o galfi le terdi .i leza'i jmive cu na'e mintu tu'a le purci .i ri ba noroi xruti .i sarcu fa lenu loi remna cu jimpe la'e di'u .i je'e .a'ucu'i sei la xendriks. cusku .i ko'a po'o citka le nanba .e le rectu gi'e jersi pinxe le ckafi .i ko'a masno lezu'o citka gi'e se nandu lenu ctiru'egau le cidja .i ba lenu mulno kei ko'a sanli gi'e stapa fagystigau .i la davyd. masno lenu stanli gi'e catlu ko'a sepi'o le citno tolci'o kanla .i .e'e mi'o klama sei la xendriks. cusku
.i xi dy. lu vi'o li'u
ni'o la xendriks. dzukla gi'e bevri le cecla .i ko'a co'a jibni .i ko'a trati gi'e bredi roda .i .ia lei rusko cu na'e se spaji tu'a lo bajra noi spuda tu'a le vo'a bajra .iku'i ry. ckaji leka tcica .i ru'i cumki fa lonu srera .i ko'a catlu le ru'u tumji'u .i po'o le runme jinme .e le fagyfesti .e so'u le cmana .e le tricu poi ba'o jelca .i bitmu besema'e lo xumrkonkreto .iku'i ve'aca'e stuzi le pamoi be le'i badydi'u pe le rusko korbi .i le crane ke minde girzu .i lolni'a .i condi lo cnita .i po'o lo viska tutci .e so'u lo cecla tubnu cu ta'e se viska .i la'aru'e lo bonmaksi cu go'i
.i xu mi'o zi snada sei la davyd. reisku
.i xi xy. lu go'i .i xu do co'a tatpi li'u
.i xi dy. lu na go'i li'u
.i xi xy. lu .u'e ki'u ma do reisku li'u
.i la davyd. na spuda .i ko'i ti'a jundi cadzu gi'e cuxna le ko'i pluta .i le tuple ku joi le cutci cu grusi ri'a tu'a le pulce .i le trati flira cu se barna le dasri .i le rirxe be le grusi fagyfesti cu gacri le blaci skapi .i le flira cu kandi leka skari .i leka go'i cu se fadni fi le'i cnino verba noi xabju lo lolnitku'a .e lo feskevlu'a .e lo lolni'a marbi
ni'o la xendriks. jdika leka sutra .i ko'a pilno le reldarvistci lenu catlu le ca'u tumla .i xu ry. ve'a zvati gi'e ca'o denpa tu'a ko'a .i xu ry. catlu ko'a sepa'a lenu le sonci pe ko'a pu catlu le rusko bajra .i le trixe pe ko'a ze'i terpa lenku .ila'aru'e ry. ca'o bregau le cecla gi'e pu'o cfagau lonu gunta kei sepa'a lenu le sonci pe ko'a pu ba'o bregau lonu catra .i la xendriks. sisti gi'e satre lumci le flira lo xasne .i lu .oiro'e li'u .i ti se xanka ko'a .iku'i .ia tu'a ko'a cu na'e se spaji .i le tcini cu frica .i ko'a cadzu le fagyfesti gi'e tagji jgari le cecla lei re xance .i ti'a ko'a la davyd. klama .i la xendriks. catlu le sruri .i le ctebi cu tagji .i la'aru'e ziku da fasnu .i da'i spoja lo blaci gusni .i da'i se fargau da poi nenri lo condi ke xumrkonkreto badydi'u .i ko'a lafmuvgau le birka gi'e sligau ri lo cukla .i noda muvdu .i ri'u clani tolku'o seji'u le morsi tricu .i so'u le cilce skospa cu banro vi le tricu .i ve vimcu fi le purdi .iji'a le stodi ke xekri cicyspa .i la xendriks. lanli le tolku'o .i xu da zvati le gapru .i ta prane leka te jvinu .i ko'a co'a klama le tolku'o sekai leka jundi .i la davyd. smaji jersi .i va'oda'i leza'i ko'a jitro kei lo zgana cu zvati ta sezu'e lonu ganse tu'a lo sonci poi troci lonu nerkla le snura pagbu .iku'i va'o leza'i ko'a jitro kei la jgalu cu sruri tezu'e leza'i mulno leka bandu
ni'o ko'a ki sisti .i le'i jamfu cu simxu leka sepli .i le xance cu pencu le xadmidju
.i xu mi'o mo'u klama sei la davyd. cusku
.i xi xy. lu .uoru'e li'u
.i xi dy. lu mi'o sisti ki'u ma li'u
.i xi xy. lu mi to'e djica lonu funca li'u .i la xendriks. masno klama .i caku le tolku'o va lamji ko'a ri'uku .i gapru ko'a .i leka xanka cu se zenba .i va'oda'i leza'i la .aivan. gapru kei ko'a se maldimna .i ko'a za'uroi sligau .i .ia ry. to'e se spaji tu'a lo prenu poi dasni lo manfyta'u pe la .ubus.nys. lu'u poi te spuda tu'a le notci botpi .ijonai ro ti tcica .i xi xy. lu ko lamji mi li'u .i ko'a carna fi la davyd. i lu ko na'e ti'a klama li'u
.i xi dy. lu xu lamji do li'u
.i xi xy. lu ca'u vi mi .i mi'o jibni zo'e .i mi'o na'e troci lonu funca .i ko klama li'u
.i xi dy. lu mi ba snura li'u .i la davyd. klama ti'a lo mitre be li so'u gi'e ca'o jgari le ko'i cribe
.i xi xy. lu .a'ucu'i ko mansa vo'a li'u .i la xendriks. za'uroi pilno le vistci gi'e trati .i ze'iku .u'e da muvdu .i ko'a lanli le tolku'o .i roda smaji .i morsi .i noda poi jmive cu ga'u zvati .ipo'o lo morsi stani .e lo fagyfesti cu go'i .ila'aru'e so'u lo ratcu .i lo barda ke xekri ratcu poi renvi tu'a lai jgalu .i lo cenba be leka jgina cu di'i zbasu lo zdani lo moklu litki ku joi lo fagyfesti .i .u'e tamsmi lo zbasu pesxu .i pu'u mapti cenba .i ko'a ve denpa lezu'o ca'u klama
ni'o le rajycla cu klama ve'a le tolku'o ga'u ko'a .i le kosta cu slilu .i grusi crino .i lo rusko .i ti'a ri le remoi sonci cu to'e canci .i rusko .i re zo'e lafmuvgau le cecla .i fargau .i la xendriks. sisti .i ko'a kargau le moklu .i le sonci cu cidytse gi'e fargau le cnita fi le mlana be le salpo .i le cimoi prenu cu cmibi'o lu'o le go'i ve'a le tolku'o galtu .i le go'i cu cmalu fi lei drata gi'e dasri le grusi crino .i lo ninmu .i ri sanli ti'a le remei .i la xendriks. snada lenu bacru .i lu ko sisti li'u .i ko'a xance sligau cusku fi le cimei sekai leka xalni .i lu mi sei se dicra li'u .i re le rusko cu cecla .i ti'a la xendriks. lo'u pap le'u smaji sance i le glare boxna cu preja ko'a gi'e catke renro ko'a le loldi .i le fagyfesti cu sraku le flira gi'e se mosra fi le kanla .e le nazbi .i ko'a noi vaxydicra cu lacpu vo'a ja'e leza'i cidytse .i roti nu te kavbu .i tu'a ko'a cu se fanmo .i ko'a pu ba'o klama tezu'e lenu ko'a se catra sepa'a tu'a lo bakni .i le sonci .e le ninmu cu nitkla ko'a fo le mlana be le tolku'o gi'e sakli le ranti fagyfesti .i la xendriks. na'e ganse .i le stedu cu cortu .i sekai leka juxre kei ko'a lebna le cecla gi'e fargau ri voi se junta lo ki'ogre be lo megdo .i ko'a ruble leka jgari .i le nazbi .e le mlana be le flira cu cortu .i le vacri cu culno le kurki ke se spoja panci
.i ko na cecla sei le pamoi rusko cu cusku bebau le glibau noi fange leka se bacru .i le cimei cu klama ko'a gi'e sruri .i ko punji le cecla doi merk. sei le drata nanmu cu cusku i la xendriks. se jenca .i ro ta se temci lo tordu .i ko'a ba'o se kavbu .iji'a ta ba'o daspo le nanla .i ko'a cargau le stedu .i la davyd. na'e zvati .i da poi ve vimcu fi ko'i cu preja le drudi .i le ci rusko cu lanli ko'a sekai leka kucli .i la xendriks. zutse gi'e lumci le nazbi le ciblu gi'e vimcu le spisa be lo fagyfesti .i ko'a troci leza'i klina kei lenu desygau le stedu .i do zukte ti ma sei ko'a juxre cusku .i lu le nanla li'u
.i xi ry. lu ke'u ma ki'a li'u .i pa le sonci cu sidju ko'a lenu sanli .i le go'i cargau la xendriks. i xi ry. lu ko catlu li'u .i gau la xendriks. gacri le kanla .i xi ry. lu .e'osai ko catlu li'u .i lei rusko nanmu cu lacpu muvgau ko'a le crane .i xi ry. lu ko viska gi'e sutra .i le temci cu na'e clani doi merk. li'u .i la xendriks. catlu gi'e spaji cmoni
.i xi ry. lu .a'apei xu do ca jimpe li'u
.i to'o lei spisa pe la davyd. le xislu befi lo jinme cu gunro .i clupa .i minra jinme .i dikca pagbu .i cilta .i pa le rusko cu tikpa le derxi be le ve vimcu .i le pagbu cu se porpi gi'e mo'ito'o gunro .i le xislu .e le punsarlu .e le grana .i le slasi gacri noi xadba ckaji leka jelca cu farlu .i la xendriks. korcu ca lenu desku .i le crane be le flira cu to'e jorne .i ko'a kakne lenu viska le pluja besna bepa'u le cilta .e le cmalu tubnu .e so'iki'o le cmalu batke .i lo minji sei le sonci noi jgari le birka cu cusku .i xi ry. lu mi'a catlu leza'i ta se lidne do li'u
.i xi xy. lu se lidne mi ki'a li'u
.i xi ry. lu la'edi'u tcaci fo'a .i fo'a se lidne do .i mo'ine'i le badydi'u .i la'edi'u tadji lonu nerkla li'u
.i la xendriks. noi se jenca cu kalgaisligau .i xi xy. lu ku'i li'u
.i xi ry. lu ko kankla li'u .i lei rusko cu gidva ko'a lenu klama le tolku'o .i lu mi'o na vi stali .i na'e snura .ila'a so'inono fo'a ve'a zvati li'u
ni'o lei ci rusko mo'iga'u cpumuvgau ko'a le mlana be le tolku'o ca lonu sakli le fagyfesti .i le ninmu cu snada le galtu gi'e denpa tu'a lei drata .i le crane ke minde girzu sei la xendriks. smaji cusku .i lu mi klama tezu'e lenu te jansu tavla le softo li'u sei se dicra
.i xi ry. lu .o'onai le crane ke minde girzu na zasti .i ba'e fo'a pu nerkla .i mi'a ba ciksi li'u .i ry. joi ko'a snada le galtu be le tolku'o .i lu mi'apo'o ve vimcu .i cimei .i le drata pu nenri le badydi'u li'u .i lu ju'i ti .i ko ni'a klama fo ti li'u .i le ninmu cu klupe kargau le gacri noi grusi gi'e se setca fi le drudi .i lu ko nenri li'u .i la xendriks. falcru vo'a .i le re sonci ku joi le ninmu cu klama ti'a ko'a gi'e jersi ko'a ve'a le rajyserti .i le ninmu cu ga'orgau le gacri gi'e snuti telgau
ni'o xamgu fa lenu mi'a pu viska do sei pa le sonci cu rufsu cusku .i xi xy. lu ta bazimo'u se lidne do li'u
.i ko dunda pa le do sigja mi sei le ninmu goi ko'u cusku .i lu mi na'e se zdile lo merko sigja ze'a lo jeftu be li so'o li'u .i la xendriks. catke dunda le bakfu .i ko'u lebna le sigja gi'e dunda le bakfu lei re sonci .i ve'i le kojna be le cmalu kumfa le gustci cu di'inai te gusni .i le kumfa cu tagji gi'e se drudi le dizlo .i le vomei cu zutse ru'u le cmalu jubme be lo mudri .i le so'u to'e jinsa palta cu se derxi fi le pagbu be le jubme .i ti'a le se xrani murta le remoi kumfa cu milxe leka se viska .i la xendriks. viska le kojna be le zasni ckana be'o .e le boxfo .e le taxfu noi dandu le genxu
.i mi'a pu zvati ti sei le sonci poi lamji ko'a cusku .i ri vimcu le badmapku gi'e mo'iti'a catke le pelxu kerfa .i lu mi'e rudis.makser. poi sonci .i gugd,r,polska prenu .i bapli lenu mi cmibi'o la softo jamna kei pu lo nanca be li re li'u .i ry. tengau le xance
.i la xendriks. denpa gi'e zi desygau ra .i lu mi'e cibmoij.djosef.xendriks. li'u
.i lu mi'e klaus.epstin. li'u .i le drata sonci cu rinsa ko'a lenu desygau .i le go'i cu cmalu gi'e bunre gi'e se kerfa le co'a cinla .i la klaus. xanka pencu le kerlo .i lu gugd,r,straixe prenu .i bapli pu da poi le cevni cu djuno fi ke'a .i mi na'e morji .i le cimei be lu'i mi'a pu zvati ti .i la rudis. joi mi kansa la tasos. li'u .i ky. farja'o le ninmu .i lu ta tadji lenu mi'a pu rivbi .i ro lei drata pu ne'ini'a zvati le badydi'u li'u
.i xi xy. lu ji'a .y. ji'a jy. pu nerkla li'u
.i la klaus. jelgau le sigja .i xi ky. lu pare'uku pa zo'e co'e .i ri cmima le klesi befi leka se lidne da .ibabo ti curmi lenu lo drata cu nerkla li'u
.i la xendriks. co'a jundi .i lu .u'e le klesi ki'a .i xu leni klesi cu zmadu li pa li'u
.i xi ky. lu .i le cmalu nanla po'u la davyd. i la davyd. poi jgari le me la tedis. cribe .i le go'i cu cmima la cimoi klesi .i ri traji leka snada li'u
.i xi xy. lu lei drata klesi cu mo li'u
.i la klaus. setca le xance le kosta .i xi ky. lu ko cpacu li'u .i ky. renro le bakfu be lei pixra bei le skori le jubme .i lu ko lanli .e'u li'u .i la xendriks. to'e jgegau fi le skori
.i .a'o do jimpe sei la rudis.makser. cusku ledu'u ta mukti lenu mi'a pu djica lenu te jansu casnu .i lei rusko sa'e .i mi'a facki pu lo jeftu be li ji'i pa .i facki ledu'u lai jgalu pe do cu cfagau lezu'o finti le cnino se platu kei si'u noda .i cnino ba'e klesi be le'i sevzi .i xagmau klesi .i ni'ave'a le lolni'a fanri ti'a le mi'a korbi .i do'o curmi lezu'o jy. prina zbasu vo'a gi'e cikre vo'a .i zbasu jy. poi zmadu je zmadu fi leka pluja .i .i'anai do'o fuzme le fasnu
ni'o la xendriks. lanli lei pixra .i ri se zbasu sekai leka sutra kei gi'e kandi gi'e to'e satci .i lei so'uboi pamoi cu pixra la davyd. .i go'i lonu la davyd. cadzu lo dargu fi'o kansa noda .i la davyd. jo'u le drata me la davyd. .i ci le me la davyd. i ro lei go'i cu simxu mintu .i ro zo'e jgari le se xrani ke cribe se kelci .i ro zo'e badri
ni'o ko catlu lei drata sei la tasos. cusku
ni'o le za'umoi noi zbasu vi lo darno cu pixra leza'i le rajycla ke selxai sonci cu zutse vi lo dargu .i le birka cu se sarji .i le zbepi be pa le tuple cu tcena .i le sampu ke xadni sarji cu vreta lei tuple .i za'umai re le selxai sonci noi mintu cu re'o sanli
.i xi ky. lu ta co'e la pamoi klesi .i la selxai sonci li'u .i la klaus. tengau gi'e lebna lei pixra .i lu za'apei lai jgalu cu se platu fi lezu'o snada lo remna .i go'i lezu'o facki fi ri .i ro le klesi cu zmadu le me'imoi leka xamgu .i jy. di'i klama le zmadu befi leka clani .e leka jibni .i bancu so'e le bandu .i nenri le korbi .iku'i ze'a leza'i jy. sampu minji gi'e jinme bolci pa'u lo jgalu .e lo jirna .e lo tunta kei da pu'i daspo jy. pa'a tu'a le to'e jmive .i da pu'i ganse leka ckape minji kei zi lonu jy. se viska .i zi lonu mi'a co'a zgana zo'e sei se dicra li'u
.i xi ry. lu gau la pamoi klesi cu ruble fa ro le berti pagbu pe mi'a sei la rudis. cusku .ibazubo su'oda jimpe .i dukse be leka lerci .i fo'a goi lai selxai sonci cu nerkla ta'i lonu darxi gi'e pikci fi lonu da curmi .ija'ebo mi'a curmi lonu fo'a nerkla .iji'a bazi lonu nenri kei fo'a co'a jitro .i mi'a pu sisku leka minji li'u
.i lu ze'a la'elu'ode'u mi'a jinvi ledu'u lei klesi cu pamei sei la klaus. cusku .i noda smadi ledu'u lo drata klesi cu zasti .i le pixra pu se benji fi mi'a .i ca lenu le bajra cu se benji fi do'o kei mi'a djuno fi pa po'o le klesi no'u la pamoi .i la selxai sonci .i mi'a jinvi ledu'u ta fanmo li'u
.i xi xy. lu le korbi pe do'o cu se lebna ma li'u
.i xi ky. lu la cimoi klesi .i la davyd. jo'u le cribe .i .oi tu'a ta zmadu fi leka xamgu li'u .i la klaus. cisma seci'o leka ra'udri .i lu lo sonci cu lacri lo verba .i mi'a puki bevri dy. le nenri gi'e troci lenu ctigau .i mi'a cilre ledu'u dy. djica makau kei fu lenu nandu .ido'anai go'i fa da poi nenri le badydi'u li'u
.i xi ry. lu le cimei befi mi'a cu se xaurfu'a sei la rudis. cusku .i la klaus. joi mi .y. vitke la tasos. ca le fasnu .i ti zdani ty. li'u .i ry. ru'u sligau le barda xance .i lu ti noi cmalu lolnitku'a cu go'i .i mi'a .y. mulgau .y. gi'e cpare le rajyserti pu lenu xrukla .i ve'a le tolku'o mi'a viska .i jy. sruri le badydi'u .i ca'o nu damba .i la davyd. jo'u le cribe .i so'unonomei ra .i la klaus. te pixra li'u .i ky. xruti lei pixra leza'i bakfu
.i lu ji'a xu ti ca'o fasnu ve'a ro le do korbi sei la xendriks. cusku li'u
.i xi ry. lu go'i li'u
.i xi xy. lu .u'e ma tcini le mi'a korbi li'u .i secau lonu pensi kei ko'a pencu le ckiku pe le birka .i lu xu jy. kakne sei se dicra li'u
.i xi ry. lu jy. na'e se raktu le dirce ckiku pe do'o .i ledu'u go'o cu na'e vajni jy. i rusko ja merko ja gugd,r,polska ja dotco .i roda mintu .i jy. zukte le te platu pe vo'a .i tinbe le krasi sidbo .i jy. di'i kalte lo jmive ve'a roda poi jy. penmi ra ke'a li'u
.i lu jy. se trina lo glare sei la klaus. cusku .i la'e di'u cu te platu ca le cfari .iju'o da poi do'o finti cu jai se fanta tu'a le dirce ckiku poi do'o dasni .icaku jy. rivbi la'edi'u .i lu'a le cnino klesi cu te senta lo cnisa li'u
.i lu le drata klesi cu mo sei la xendriks. reisku .i le me la davyd. klesi .e la selxai sonci .i ma drata li'u
.i xi ky. lu da poi mi'a na'e djuno li'u .i la klaus. jarco tu'a le bitmu .i ri se dandu re le jinme tapla noi le korbi be ke'a cu rufsu .i la xendriks. sanli gi'e tadni le go'i noi korcu gi'e se ke kevna barna
.i lu le zunle pu se vimcu fi la selxai sonci sei la rudis. cusku .i mi'a daspo pa ra .i sy. pu ca'o klama le mi'a lidne badydi'u .i mi'a darxi sy. ra'i le tolku'o pa'a lenu no'a la davyd. poi jersi do li'u
.i le tapla cu se prina lu pa pi'e mu li'u .i la xendriks. pencu le drata be le tapla .i xi xy. lu xu ti pu pagbu lo cmima befi le me la davyd. klesi li'u
.i xi ky. lu go'i li'u
.i le tapla cu se prina lu ci pi'e mu li'u
.i la klaus. catlu ra re'o la xendriks .i xi ky. lu xu do jimpe fi da poi mi'o fapro .i le klesi poi drata ti zi'e goi fo'i cu zasti .ila'aru'e tu'a fo'i ba'o sisti .ila'aru'e lu'a fo'i na'e kakne .iku'i ju'o la remoi klesi cu zasti .i ti sinxa la pav. e la cib. li'u
ni'o lu do xaurfu'a sei la rudis. cusku .i la davyd. pu jersi do ze'a lenu do klama ti gi'e na xrani do .ila'a dy. jinvi ledu'u do gasnu lonu dy. nerkla lo badydi'u li'u
.i lu lonu paboi jy. nerkla cu se jalge leza'i fanmo sei la klaus. cusku .i jy. sutra lozu'o muvdu .i pa jy. gasnu lonu ro le drata cu nerkla .i jy. se steci .i minji su'epa da .i jy. se zbasu tezu'e su'epa da li'u .i ky. satre lumci le ctebi lo xasne .i lu mi'a pu zgana li'u
.i lei prenu cu smaji
.i lu ko za'uroi dunda le sigja mi doi merk. sei la tasos. cusku .i ta xamgu .i mi na'eru'e morji fi le srana be ta li'u
ni'o ni'o caki nicte .i le tsani cu xekri .i no le tarci cu se viska fi lei preja dilnu be lo fagyfesti .i la klaus. lafmuvgau le gacri sekai leka capyju'i kei tezu'e lenu la xendriks. cu catlu le bartu
.i la rudis. farja'o le manku .i xi ry. lu ta vave'a stuzi le badydi'u noi mi'a pu zvati .i ki'otre be li su'e pimu .i funca fa lenu la klaus. e mi na'e zvati ca le fasnu .i ka ruble .i .u'e snura ri'a lonu mi'a rarna djica li'u
.i lu ro le drata cu ju'o morsi sei la klaus. cusku fo le smaji voksa .i puze'i fasnu .i ziki le cerni la politburos. ba'o jdice .i ri te notci fo mi'a no'u le crane ke minde girzu .i le xe mrilu pe mi'a zi'e goi fo'o cu bazi se benji .i mi'a viska lenu fo'o co'a klama le farna be le do'o korbi .i mi'a jai bandu fo'o pu leza'i mi'a na'e viska li'u
.i xi ry. lu la .aleks.radrivskis. goi fo'o .i mi'a slabu fo'o .i fo'o canci ti'u li xa .i le solri cu puzi to'e canci .i ti'u li ji'i pare curmi lenu la klaus. e mi cando ze'a lo cacra .i mi'a cpare mo'ito'o lei badydi'u .i noda zgana .i mi'a klama ti .i le tcadu pu ve'a se stuzi ti .i so'u lo zdani .e lo klaji .i ti pu lolnitku'a lo barda zdani .i mi'a djuno ledu'u la tasos. zvati ti sezu'e lenu mipri ne'i le cmalu zdani pe ty. i mi'a pu klama ti .i lo drata ne le badydi'u ta'e klama ti .i tu'a le cabdei cu krefu fi mi'a li'u
.i lu ke'u mi'a pu snura sei la klaus. cusku .i funca .i lenu lo drata cu co'e cu cumki .i mi'a .y. mi'a mulgau .ibakibo mi'a klama le loldi gi'e co'a xrukla fo le tolku'o .i mi'a viska ko'e goi lai davyds. i mi'a zi jimpe .i mi'a pu viska le pixra be lu'a la pamoi klesi .i la selxai sonci .i gau le sabji sonralju pe mi'a le pixra ku joi lo ciksi cu fatri mi'a .i loda'i nu mi'a di'a klama lo mitre cu rinka lonu ko'e viska mi'a .i da'inai lenu mi'a daspo re la davyd. cu sarcu pu lenu mo'u xrukla .i so'unonoboi dy. ru'u zvati .i simsa loi manti .i mi'a te pixra gi'e mipri xrukla ti gi'e tagji telgau le gacri li'u
.i xi ry. lu dy. no'e ckape va'o lonu do facki fi le zilpavykansa .i mi'a zmadu dy. leka muvdu sutra .iku'i dy. ckaji leka to'e sisti .i na simsa lo jmive .i lu'o dy. klama mi'a fo lo sirji .ije mi'a spoja darxi dy. li'u
ni'o la cibmoij.xendriks. sanli re'o le korbi be le gacri gi'e zenba leka viska fi lo manku .i lu xu snura va'o leza'i le gacri cu kalri li'u
.i xi ry. lu .ijo mi'o jundi .i ra sarcu lenu do sazri le cradi li'u
.i la xendriks. goi ko'a lafmuvgau le cmalu cradi sekai leka masno .i ko'a catke ri re'o le kerlo .i le jinme cu lenku gi'e cilmo .i ko'a kafke fa'a le sance gasyca'a gi'e tengau le cmalu bonmaksi .i le kandi sance cu se tirna ko'a .i xi xy. lu .ie la'edi'u jetnu li'u
.iku'i ko'a denpa
.i mi'a mo'ini'a lacpu do va'o lonu ckape sei la klaus. cusku
.i xi xy. lu ki'e li'u .i la xendriks. denpa lo snidu be li so'o leza'i le cradi cu se sarji le janco .i lu .u'e ti cinri .iepei li'u
.i xi ky. lu ma go'i li'u
.i xi xy. lu le cnino klesi .i le cnino jutsi pe la jgalu .i jy. traji leka vlipa tu'a mi'o .iepei .icaku jy. ba'o la'a nerkla le korbi pe la ubus.nys. ji'a .i ti mukti lenu mi manci ledu'u mi'o ca'o zgana lenu tu'a lo cnino jutsi cu cfari .i le ba'e ralju be le'i jutsi .i pu'u farvi .i le se terdi poi jersi loi remna li'u
.i la rudis. cmoni .i xi ry. lu noda ba basti loi remna li'u
i xi xy. lu .ienaipei ki'u ma .ila'aru'e mi'o da'inai ca'o zgana ti po'u le fanmo be tu'a loi remna be'o .e lenu cfari fa tu'a le cnino kulnu li'u
.i xi ry. lu lu'o jy. na prenu .i jy. minji catra .i do'o finti jy. lonu daspo .i ripo'o se kakne jy. i .ionai jy. minji zo'e li'u
.i xi xy. lu .i .ieru'e za'a ca go'i .iku'i jy. ba ckaji ma ba'o lenu jamna .ila'aru'e le jinzi se kakne be jy co'a se jarco va'oda'i leza'i no lo remna noi jy. daspo cu renvi li'u
.i xi ry. lu .ue do darlu ledu'u jy. jmive li'u
.i xi xy. lu xu jy. na jmive li'u
.i smaji .i lu jy. minji sei la rudis. cusku .i jy. simlu leka remna gi'uku'i minji li'u
.i xi ky. lu ko pilno le do cradi doi cibmoij. do'u sei la klaus. cusku .i mi'o na kakne lenu ze'e vi stali li'u
.i la xendriks. tagji jgari le cradi gi'e benji fi le judri be le minde badydi'u .i ko'a denpa fi leza'i tinju'i .i noda spuda .ipo'o smaji .i ko'a jundi lanli lei cilta .i rori mapti .i lu doi skat. do'u sei ko'a bacru fa'a le gasyca'a .i xu do tirna li'u .i smaji .i ko'a fe'eba'o tengau le bonmaksi gi'e za'uroi troci .ipo'o savru
.i xi xy. lu mi te benji noda .ila'aru'e tu goi ko'u tirna tu'a mi gi'u djica lonu spuda li'u
.i xi ry. lu ko cusku lesedu'u ti nu mutce be leka ckape li'u
.i xi xy. lu .ienai ko'u ja'e jinvi ledu'u mi bai benji .i se jitro do'o li'u .i ko'a za'uroi troci gi'e ze'i skicu le se cilre be ko'a .iku'i le po'o kandi savru cu se cradi
.i lu za'a tu'a lo dirce lalxu cu zunti piso'e lonu benji sei la klaus. baza cusku .i la'aru'e ta rinka li'u
.i la xendriks. ga'orgau le cradi .i xi xy. lu noda prali .i noda spuda .i .u'e lo dirce lalxu cu co'e la'aru'e .ija ta tirna tu'a mi gi'e cuxna na'ebo lonu spuda .ije'u mi zukte le go'i va'oda'i lenu lo bajra cu benji fo le softo korbi .i noda krinu lonu ta tugni fo tu'a le lisri .i la'a lei bradi cu tirna roda poi mi cusku li'u
.i xi ky. lu .ija la'aru'e dukse be leka lerci li'u .i la xendriks. stedu muvgau
.i xi ry. lu .e'u mi'o zukte lenu le gacri cu ganlo sei la rudis. xanka cusku .i mi'o na'e djica lo to'e sarcu nu funca li'u .i xy. joi ky. joi ry. goi fo'a masno cpare le nitytu'u le cnita .i la klaus. telgau le gacri vi le vorme .i fo'a mo'ine'i klama le jupku'a .i le vacri cu denmi
.i lu xu jy. ka'e gunka sekai le sau ka sutra sei la xendriks. cusku .i mi cliva le badydi'u ti'u li pare .i purci lo cacra be li pano .i ta'i ma jy. snada ze'a ra li'u
.i xi ky. lu lenu jy. co'e cu na'o na'e clani .i go'i ba lenu lo pamoi cu nerkla .i tu'a ri co'a cilce vlile .i do djuno fi le se kakne be la jgalu poi cmalu .ido'a ri cu traji be leka vlile .i ro le degji cu balre .i fenki li'u
.i xi xy. lu .o'onai je'e li'u .i la xendriks. mo'ito'o muvdu .i ko'a sanli to'o ry. joi ky.
.i ma raktu sei la rudis. cusku
.i xi xy. lu le lunra jemyzda .i .iicai va'o lenu jy. snada ra sei se dicra li'u
.i xi ry. lu le lunra jemyzda ki'a li'u
.i la xendriks. carna .i lu ju'a jy. na snada le lunra jemyzda .i ta'i ma jy. klama ra .i zo'e na cumki .i mi na'e kakne lonu krici ta li'u
.i xi ry. lu .a'u le lunra jemyzda cu mo .i mi'a pu cpacu lei nuzba .iku'i no ri satci .i ma fatci tcini .i .a'a do simlu leka se raktu li'u
.i xi xy. lu mi'a di'i te sabji fi le lunra .i le truci'e cu zvati ly. ni'a le lunra sefta .i ro le prenu .e ro le gundi vu'o pe mi'a cu go'i .i ta sarcu leza'i mi'a renvi .i va'oda'i jy. facki fi lo tadji be lonu klama fi le terdi fe le lunra sei se dicra li'u
lu xi ry. .i pa jy. banzu .i ba lenu le pamoi cu nerkla kei ri curmi lenu le drata cu co'e .i so'unonomei jy. noi ro ke'a simxu mintu .i .ii da'i do pu viska lu'o jy. i .u'e mintu .i simsa loi manti li'u
.i xi ty. lu zo'o prane guntrusi'o sei la tasos. cusku .i le prane be leka guntrusi'o jecta .i ro lo'i se gugde cu simxu lonu basti li'u
.i la klaus. fengu cmoni .i xi ky. lu .i'enai ta banzu .i ke'unai ma fasnu li'u
.i la xendriks. xanka cadzu ve'i le cmalu kumfa .i le vacri cu culno lei panci be lo cidja .e lo xasne .i le drata cu catlu ko'a .i bazabo la tasos. catke pagre le murta le drata kumfa .i xi ty. lu mi ze'a sipna li'u .i le murta cu ganlo ti'a la tasos. .i la rudis. e la klaus. zutse re'o le jubme gi'e ca'o catlu la xendriks.
i lu .a'ucu'i ko cuxna sei la klaus. goi ko'i cusku .i mi'a na'e djuno fi le tcini be do'o li'u
.i la xendriks. stedu muvgau
.i ti nabmi sei la rudis. goi ko'o cusku .i ko'o pinxe le ckafi ba lenu gau culno fa le kabri fi'o sorcu le kijyselxai patxu .i lu mi'o ze'a snura ve'i ti .iku'i na cumki fa le ze'e za'i mi'o stali ti .i leni cidja ja se sabji cu na banzu li'u
.i xi xy. lu ku'i va'o lenu mi'o klama le bartu sei se dicra li'u
.i xi ry. lu .i go mi'o klama le bartu gi jy. co'e mi'o .isa'e la'a jy. co'e mi'o .i mi'o na'e nu'o klama lo darno .ipau ti bi'i le badydi'u pe do cu ki'otre ma doi cibmoij. li'u
.i lu lo ki'otre be li mu bi'o xa li'u
.i xi ry. lu cumki fa lenu mi'o snada .i lu'o vo mi'o .i le go'i cu kakne lenu catlu ro le farna .ija'ebo jy. na kakne lenu ti'a klama gi'e co'a jersi mi'o .i mi'a ponse ci lo cecla no'u lo spoja cecla .i .ai la tasos. te dunda le mi cmacelxa'i li'u .i la rudis. degji darxi le befsri .i lu mi'a pe le softo jenmi cu di'inai claxu le cutci gi'eku'i ponse le cecla .i va'o leza'i ro mi'o te xarci kei cumki fa lenu piso'u mi'o snada cei broda tu'a le minde badydi'u .i .a'o do broda doi cibmoij. li'u
.i ma jalge leda'i za'i jy. ba zvati sei la klaus. cusku
.i la rudis. jangalgau .i xi ry. lu .ija'ebo mi'o xrukla ti li'u
.i la xendriks. sisti lezu'o cadzu .i xi xy. lu pau leni lakne fa leza'i jy. ca bancu le merko korbi cu du ma li'u
.i xi ry. lu fu'inai .i ta lakne .i lu'o jy. se ganzu gi'e satci djuno fi le se zukte be jy. i ba lonu tu'a jy. cfari kei lu'o ri simsa lo gunma be lo pipyjalra .i jy. nitcu leza'i ru'i muvdu .iji'a sutra .i jy. lacri leka mipri .e leka sutra .i ka spaji .i jy. ta'e nerkla pu lonu da sanji li'u
.i xi xy. lu je'e li'u se ke smaji cusku
ni'o ne'i le drata kumfa la tasos. goi ko'u muvdu .i xi ty. lu doi cibmoij. li'u
.i la xendriks. mo'iti'a catke le murta .i xi xy. lu re'i li'u
.i la tasos. lazni catlu ko'a vi le ckana .i lu .e'o xu do ralte su'o lo merko sigja li'u
.i la xendriks. klama le kumfa gi'e ragve befi ko'u zutse le mudri stizu .i ko'a sisku fi le'i te daski .i xi xy. lu na go'i .i ro zo'e se xaksu li'u
.i xi ty. lu .uu li'u
.i xi xy. lu ma natmi do li'u bazi se reisku la xendriks.
.i xi ty. lu rusko li'u
.i xi xy. lu ta'i ma do klama ti li'u
.i xi ty. lu ti ki'a li'u
.i xi xy. lu ti puzu fraso gugde .i ti pu pagbu la normandis. i xu do kankla le softo jenmi li'u
.i xi ty. lu mu'i ma li'u
.i xi xy. lu mi kucli li'u .i ko'a tadni ko'u .i ko'u pu vimcu le kosta gi'e renro ri le korbi be le ckana .i ko'u citno .i nanca be li ji'i reno .i cinla .i lei clani kerfa cu preja le kicne .i ko'u ca'o catlu ko'a sekai leka smaji .i lei kanla cu manku gi'e barda
.i do pensi ma sei la tasos. cusku
.i xi xy. lu noda .i do jbena pu lo nanca be ma li'u
.i xi ty. lu li pabi li'u .i ko'u ca'o catlu ko'a gi'e na'e kalgaisligau .i le birka cu trixe le stedu .i ko'u dasni le palku .e le creka vu'o pe le rusko jenmi .i grusi crino .i dasni le rotsu ke skapi befsri poi te lasna le kancu ku joi lei danti ku joi le ve mikce tutci bakfu
.i xi xy. lu xu do cmima le softo jenmi li'u
.i xi ty. lu na go'i li'u
.i xi xy. lu do cpacu le vi manfyta'u ma li'u
.i ko'u jangalgau .i xi ty. lu ti pu se dunda mi li'u
.i xi xy. lu do .y. tu'a do nanca ma ca lenu do klama ti li'u
.i xi ty. lu li paxa li'u
.i xi xy. lu je'upei citno li'u to xy. toi
.i le ko'a kanla co'a jarki .i lu mi na jimpe li'u
i la xendriks. satre le xedja .ida'i lu lei se lifri be do cu frica va'o na'ebo lenu jamna .i .u'e li paxa .i do klama ti ca leza'i do jai nanca li paxa .ida'i .uusai lifri lu'o ti li'u
.i xi ty. lu .u'ucu'i mi nitcu fi leza'i renvi li'u
.i xi xy. lu mi na ctuca li'u
.i da'i lei se lifri be do cu frica ji'a sei la tasos. smaji cusku .i ko'u mo'ini'a tengau gi'e to'e lasna pa le cutci .i ko'u renro le cutci le loldi .i lu doi cibmoij. do'u .e'o xu do djica lenu klama le drata kumfa .i mi tatpi li'u
.i xi xy. lu .ika'u ti ba nabmi .i leza'i vo mi'o zvati ti .i lezu'o xabju le vi zdani cu nandu .i xu re po'o le kumfa cu co'e li'u
.i xi ty. lu go'i li'u
.i xi xy. lu ma ni canlu be le pu lolnitku'a .i xu ri pu zmadu ti .i xu lo da'i drata kumfa noi culno lo festi cu pagbu .ila'aru'e mi'o nu'o kargau pa le go'i li'u
.i xi ty. lu la'aru'e .i mi ju'o na'e djuno li'u .i gau la tasos. kluza fa le befsri .i ko'u gau zenba leka kufra kei gi'e to'e lacri le creka .i lu .o'u do birti ledu'u do .uu ba'o xaksu ro le sigja li'u
.i xi xy. lu mi pu ponse le pa po'o bakfu li'u
.i xi ty. lu .uu la'a va'oda'i lenu mi'o snada le do badydi'u kei mi'o facki fi so'o zo'e li'u .i le drata cutci cu farlu .i la tasos. jgari le gustci skori .i lu co'o li'u
.i xi xy. lu xu do co'a sipna li'u
.i xi ty. lu go'i li'u
ni'o le kumfa cu manku .i la xendriks. sanli gi'e pagre le murta le jupku'a .ije ko'a tinsa sisti .i la rudis. goi ko'o sanli re'o le bitmu gi'e se flira le blaci je cilmo .i le moklu cu kalri ce'o ganlo gi'eku'i na'e se sance .i la klaus. crane ry .i le jipno be le cmacelxa'i cu tunta le betfu be ry. i pino le remei cu muvdu .i la klaus. noi jgari le cecla le xance cu junri flira .i la rudis. blaci je smaji .i le xadni pe ko'o cu tcena re'o le bitmu
.i ma sei la xendriks. cusku .iku'i tu'a la klaus. goi ko'i dicra
.i xi ky. lu ko smaji doi cibmoij. i ko klama ti .i le cecla .i ko lebna le do cecla li'u
.i la xendriks. lacpu le cmacelxa'i .i xi xy. lu ti mo li'u
.i xi ky. lu ko bandu li'u .i la klaus. xance minde ko'a lenu klama le crane .i lu ko lamji mi .o'onai li'u
.i la rudis. dzimuvgau le birka .i ko'o carna la xendriks. gi'e pencu le ctebi le tance .i le blaci senta befi le kanla cu minra sekai leka fenki .i le xasne cu se krasi le mebri gi'e preja le flira .i ko'o catlu la xendriks. i xi ry. lu doi cibmoij. ky. fenki .i ko jai fanta li'u .i le voksa be la rudis. cu smaji gi'e rufsu .i nandu fa lenu se tirna le go'i
.i xi xy. lu ma fasnu li'u se reisku la xendriks.
.i ca leza'i na'e dzimuvgau le cecla kei la klaus. spuda .i lu doi cibmoij. do'u xu do morji le casnu fi le ci klesi .i mi'a djuno fi la pav. e la cib. iku'i mi'a na'e djuno fi la rel. ido'anai mi'a pu na'e djuno li'u .i lei degji cu zenba leka tagji le cecla zargu .i lu .i mi'a na'e djuno pu'o zo'e .iku'i .ua mi'o co'i djuno li'u
.i ky. sazri le batke .i le spoja be le blaci glare cu gunro se krasi le cecla gi'e sruri la rudis.
.i xi ky. lu doi cibmoij. ti cmima la remoi klesi li'u
.i la tasos. catke le murta .i lu doi klaus. uecai do gasnu ma li'u
.i la klaus. carna fi to'ebo le jelca tabno xadni noi masno farlu le loldi mo'ire'o le bitmu .i xi ky. lu la remoi klesi doi tasos. i mi'o co'i djuno .i mi'o facki fi ro le ci klesi .i leka ckape cu se jdika .i mi sei se dicra li'u
.i la tasos. catlu zo'a ko'i le xadni be la rudis. be'o no'u lei xekri je se danmo se porpi joi spisa be lo bukpu .i xi ty. lu .ue do catra ry. li'u
.i xi ky. lu ry. ki'a .i za'apei la'e ry. cu minji .i mi pu ca'o catlu .i mi co'a jijnu gi'u na'e birti .ido'anai mi pu na'e birti .iku'i ze'a le zi vanci mi birti li'u .i la klaus. xanka satre le zargu be le cmacelxa'i .i lu mi'o se xaurfu'a .i xu do jimpe .i ba lo cacra cu cumki sei se dicra li'u
.i xi ty. lu do pu'o ba'e birti li'u .i la tasos. klama mo'izo'a ko'i gi'e korcu vi lei se danmo spisa ne le loldi .i le ko'u flira cu jarco leka junri .i lu doi cibmoij. ko viska .i bongu .i rectu li'u .i la xendriks. korcu vi ko'u .i lei spisa cu remna spisa .i jelca rectu .i jelca tabno spisa lo bongu .i pagbu lo sedbo'u .i sluji joi canti joi ciblu .i lei ciblu cu co'a lalxu re'o le bitmu .i no lo xislu sei la tasos. to'e xanka cusku .i ko'u sirji .i lu no lo xislu .e no lo minji spisa .e no lo clupa .i na'e me la jgalu .i na'e me la remoi klesi li'u .i le'i birka cu simxu kruca .i lu do bilga lenu ciksi tu'a ti li'u
.i la klaus. zutse re'o le jubme .i suksa fa lenu le flira cu jdika leka skari kei li ro .i ko'i punji le stedu le xance gi'e slilu fi le crane ce trixe
.i xi ty. lu ju'i do'u ko sisti li'u .i lei degji befi la tasos. tagji le janco be ko'i .i lu .ai ma mukti ti do .i ki'u ma do catra ry. li'u
.i lu ky. terpa sei la xendriks. cusku .i ro ti .i leka ckape cu se zenba ru'u mi'o li'u
.i xi ty. lu la'aru'e li'u
.i xi xy. lu .ienaipei .e'o ky. mo .i ma se jinvi do li'u
.i xi ty. lu mi jinvi ledu'u da krinu lenu ky. catra la rudis. i le vajni krinu li'u
.i xi xy. lu ma krinu li'u
.i xi ty. lu la'a la rudis. cilre da li'u
.i la xendriks. catlu le badri flira be ko'u .i ry. cilre fi ma sei ko'a reisku
.i xi ty. lu cilre fi ky. i la klaus. li'u
.i la klaus. sutra jundi .i xi ky. lu do ka'e jimpe tu'a le smuni pe ty. .i ty. jinvi ledu'u mi me la remoi klesi .i xu do na'e jimpe doi cibmoij. i ty. djica leza'i do jinvi ledu'u mi tezu'e catra ry. .i go'i ledu'u mi co'e sei se dicra li'u
.i xi ty lu ma krinu lenu do catra ry. li'u
.i xi ky. lu mi ba'o ciksi fi do li'u .i la klaus. desygau le stedu sekai leka tatpi .i lu mi pu jinvi ledu'u ry. me la jgalu .i mi pu jinvi ledu'u mi djuno li'u
.i xi ty. lu ma krinu li'u
.i xi ky. lu mi pu ca'o catlu ry. i mi fuzyji'i li'u
.i xi ty. lu ma ve jinvi li'u
.i xi ky. lu mi pu krici ledu'u mi viska da kei gi'a tirna da .i mi jinvi li'u .i ky. sisti
.i xi ty. lu ko ve denpa li'u
.i xi ky. lu mi'a puki zutse re'o le jubme gi'e kelci lei karda .i do'o zvati le drata kumfa .i smaji .i mi jinvi ledu'u mi tirna lenu ry. y. se sance lo'u .ur le'u li'u .i smaji
.i lu xu do tugni fi ta li'u se cusku la tasos. la xendriks.
.i xi xy. lu go'i .i mi tugni fi la'e da poi ky. cusku li'u
.i xi ty. lu mi na go'i .i mi jinvi ledu'u ky. catra la rudis. ki'u lo vajni li'u .i la tasos. pencu le cecla poi zvati le kojna be le kumfa .i lu doi cibmoij. li'u
.i xi xy. lu .i'enai li'u .i la xendriks. desygau le stedu .i lu .ai ko sisti caku .i pa zo'e banzu .i mi'o terpa pa'a leza'i ky. pu no'a .i go mi'o catra ky. gi mi'o gasnu le mintu be lenu ky. co'e la rudis. li'u
.i la klaus. catlu ko'a sekai leka ckire .i xi ky. lu ki'e .i .oiro'i mi terpa .i do jimpe .iepei .i caku ty. terpa pa'a leza'i mi pu no'a .i ty. djica lonu catra mi li'u
.i xi xy. lu noda ca'o catra li'u .i la xendriks. klama le jipno be le rajyserti .i lu .ai mi klama le gapru gi'e za'uroi troci tu'a le benji .i go mi fliba gi mi'o klama le mi'a korbi ca le bavlamcerni li'u
.i la klaus. sutra sanli .i lu .ai mi kankla do gi'e sidju li'u
ni'o ni'o le nicte vacri cu lenku .i le terdi cu jdika leka glare .i gau la klaus. goi ko'i culno fa le fepri .i ko'i e la xendriks. goi ko'a stapa le loldi ze'o le nitytu'u .i lei jamfu pe la klaus. cu sepli .i le cecla cu galtu .i ko'i zgana gi'e tinju'i .i la xendriks. demtse vi le vorme be le nitytu'u gi'e cargau le cmalu cradi
.i xu do snada sei la klaus. za reisku
.i xi xy. lu na ca go'i li'u
.i xi ky. lu ko ca'o troci .i ko skicu le fasnu tu li'u
.i la xendriks. ca'o troci secau lonu snada .ibazabo ko'a dzimuvgau le bonmaksi .i xi xy. lu noda prali fi ti .i tu na'e kakne lonu tirna .ija tu tirna tu'a mi gi'e cuxna na'ebo lenu spuda .i zu'unai sei se dicra li'u
.i xi ky. lu zu'unai la'a tu na zasti li'u
.i xi xy. lu .a'oru'e mi troci fi lepo'o za'umoi li'u .i la xendriks. lafmuvgau le bonmaksi .i xi xy. lu doi skat. i xu do tirna tu'a mi .i re'i li'u .i ko'a tinju'i .ipo'o savru .ibazibo di'e mutce be leka kandi
.i lu mi'e la skat. li'u
.i lei degji befi ko'a cu zenba leka tagji .i xi xy. lu doi skat. i xu ti se benji do li'u
.i xi sy. lu mi'e la skat. li'u
.i la klaus. demtse .i xi ky. lu .a'u xu ti co'e le do minde li'u
.i xi xy. lu doi skat. ko tinju'i .i xu do jimpe .i go'i fi jy. po'u lai jgalu .i xu do cpacu le notci befi mi .i xu do pu te benji mi li'u
.i xi sy. lu go'i li'u .i kandi .i milxe leka se tirna .i ko'a ka'eru'e tirna tu'a le valsi
.i xi xy. lu .iepei do pu cpacu le notci .i xu le badydi'u cu snura .i xu no jy. snada lenu nerkla li'u
.i xi sy. lu roda xamgu li'u
.i xi xy. lu xu jy. pu troci lonu nerkla li'u
.i le voksa cu jdika leka cladu .i xi sy. lu na go'i li'u
.i la xendriks. carna fi la klaus. i xi xy. lu tu snura li'u
.i xi ky. lu xu tu pu se gunta li'u
.i xi xy. lu na go'i li'u .i la xendriks. catke le selsnapra re'o le kerlo .i lu doi skat. mi se nandu lenu tirna tu'a do .i xu do te notci fo la lunra jemyzda .i xu ri djuno .i xu ri sanji li'u .i noda te spuda .i lu doi skat. do'u xu do tirna li'u .i smaji .i la xendriks. kluza .i lu canci .ipe'i se rinka tu'a lo dirce lalxu li'u
.i la xendriks. ce la klaus. simxu lenu catlu .i no zo'e cusku .ibazabo la klaus. cusku lu .a'u xu ta sance pa ledo prenu .i xu do kakne lenu te cmene le se voksa li'u
.i xi xy. lu ta dukse leka kandi li'u
.i xi ky. lu xu do na'e birti li'u
.i xi xy. lu go'i li'u
.i xi ky. lu cumki fa lenu ta co'e sei se dicra li'u
.i xi xy. lu .uanai caku mi na'e birti .i .e'u mi'o klama le cnita gi'e ga'orgau le gacri li'u
ni'o ko'a .e ko'i masno cpare le rajyserti le glare lolnitku'a .i la klaus. telgau le gacri .i la tasos. denpa ko'a .e ko'i .i le flira cu jarco no lo se cinmo
.i xu do snada sei ko'u reisku
.i noda spuda .i la klaus. za cusku lu do jinvi ma doi cibmoij. i xu ta pu sance lo sonralju pe do ku .a lo cmima .ii lu'i jy. li'u
.i xi xy. lu mi na'e jdice li'u
.i xi ky. lu .uanai ja'o mi'o se xruti fi le mintu be le purci li'u
.i la xendriks. catlu le loldi .i le xedja cu tagji .i xi xy. lu lenu mi'o cliva cu sarcu .ai ju'o li'u
.i xi ky. lu mi'o te sabji lo cidja ze'a po'o lo jeftu be li so'u .i ba ra lenu cliva fi le gapru cu se bapli li'u
.i xi xy. lu pe'iru'e go'i li'u
.i lu ma nabmi sei la tasos. reisku .i xu do snada lenu benji fi le do badydi'u li'u
.i lu la'aru'e ta cmima le'i mi sonci sei la xendriks. masno cusku .ija la'aru'e ta cmima lu'i jy. iku'i mi'o na'e djuno ca leza'i vive'i sanli li'u .i ko'a catlu le junla .i lu .e'u mi'o vreta gi'e sipna .i .e'e mi'o djica lenu cikna zi le clira li'u
.i xi ty. lu clira ki'a li'u
.i le clira pe le cerni cu xamgu fi lonu rivbi lai jgalu sei la xendriks. cusku
ni'o ni'o sudga je na'e te dilnu ze'a le cerni .i la cibmoij.xendriks. goi ko'a catlu le tumla sepi'o le reldarvistci
.i xu do viska da sei la klaus. goi ko'i cusku
.i xi xy. lu na go'i li'u
.i xi ky. lu xu do viska lei badydi'u pe mi'a li'u
.i xi xy. lu ma farna li'u
.i xi ky. lu .e'u li'u .i la klaus. lebna le reldarvistci gi'e jaigau stika ri .i lu mi djuno fi le stuzi li'u .i ky. ze'u catlu sekai leka smaji
.i la tasos. klama le vorme be le nitytu'u gi'e mo'iga'u stapa le loldi .i xi ty. lu xu do viska da li'u
.i xi ky. lu na go'i li'u .i la klaus. dunda le reldarvistci la xendriks. i lu .i jy. na'e se viska .i ko kankla .i .e'u mi'o na'e vi stali li'u
ni'o le cimei goi fo'a cu klama le cnita fo le mlana be le tolku'o gi'e sakli le ranti fagyfesti .i le respa cu cpare litru le pinta rokci .i fo'a suksa sisti gi'e trati
.i ma muvdu sei la klaus. smaji cusku
.i xi xy. lu lo respa li'u .i le respa ca'o bajra gi'e sutra litru le fagyfesti .i le go'i cu simsa le fagyfesti leka skari
.i lu prane leka mapti cenba sei la klaus cusku .i krinu tu'a lei sidbo pe mi'a .i sa'e ra pe la lisenkos. li'u .i fo'a snada le dizlo befi le tolku'o gi'e sisti .i fo'a denmi sanli ca lenu ru'u catlu
.i xi xy. lu .e'e ko klama sei la xendriks. co'a cliva .i ti clani nu klama xeka'a lezu'o cadzu li'u
.i la klaus. cadzu vi ko'a .i la tasos. ti'a cadzu gi'e jgari le cmacelxa'i sekai leka jundi .i lu doi cibmoij. mi ze'a djica lonu te preti fo do sei la klaus. cusku .i do pu penmi la davyd. ta'i ma .i sa'e dy. poi jersi do li'u
.i xi xy. lu mi penmi dy. vi le pluta .i nenri loi dinju festi li'u
.i xi ky. lu ma se cusku dy. li'u
.i xi xy. lu so'uda .i dy. xusra ledu'u zilpavykansa li'u
.i xi ky. lu xu do na'e kakne lenu ganse leka minji .i xu dy. cusku pa'a tu'a lo jmive prenu .i .uesai xu do na'e fuzyji'i li'u
.i xi xy. lu leni se cusku dy. cu cmalu .i mi ganse noda poi to'e fadni li'u
.i xi ky. lu cizra .i lonu lo minji cu mutce simsa lo remna cu tcica da .i jibni fi leka jmive .i .u'e mi pensi ledu'u makau fanmo ti li'u
.i lu jy. ca'o gunka da poi lai merk. finti fi ke'a sei la tasos. cusku .i do'o finti fi lepu'u jy. kalte ce'o daspo lo jmive .i remna jmive vi roda poi jy. facki li'u
.i la xendriks. jundi la klaus. i xi xy. lu mu'i ma do reisku .i .a'u ma pensi do li'u
.i noda sei la klaus. spusku
.i lu la klaus. jinvi ledu'u do co'e la remoi klesi sei la tasos. ti'a to'e xanka cusku .i caku ky. jundi do li'u
.i le flira be la klaus. binxo leka xunre .i xi ky. lu .ienaipei mi'o pu benji le bajra le merko korbi .ibabo xy. xrukla .ila'aru'e xy. jinvi ledu'u xy. facki fi le xamgu se kalte ve'a ti li'u
.i la xendriks. rufsu cmila .i xi xy. lu mi pu klama fi le badydi'u pe la ubus.nys. i le remna cu sruri mi li'u
.i xi ky. lu la'a do facki fi lo tadji be lenu pagre le softo korbi .ila'a do facki fi le gaurtcini .ila'a do sei se dicra li'u
.i xi xy. lu le softo korbi pu ba'o se pagre .i le korbi pe do cu se gunta pu lenu mi cliva le badydi'u pe mi .i ko morji la'edi'u li'u
.i la tasos. klama lo lamji be ko'a .i xi ty. lu la'edi'u krinu noda sa'e doi cibmoij. li'u
.i xi xy. lu ki'u ma li'u
.i xi ty. lu .iza'a leni lei klesi cu casnu cu cmalu .i ro le klesi cu se fanri le drata .i pe'i le go'i na'e se gunma gunka .i cumki fa lenu do pu co'a klama le softo korbi va'o leza'i djuno noda fi le se gunka be le drata klesi gi'ado'anai ri mo li'u
.i xi xy. lu .u'e ta'i ma do djuno so'i da la jgalu li'u
.i xi ty. lu mi di'i viska jy. i mi di'i zgana jy. i mi zgana lenu jy. gunta le softo badydi'u li'u
.i lu do djuno lo so'imei sei la klaus. cusku .i .ia da'inai do pu viska lo so'umei .i cizra fa ledu'u do pu'i certu lezu'o zgana li'u
.i la tasos. cmila .i xi ty. lu xu do fuzyji'i mi caku li'u
.i ko to'e morji sei la xendriks. cusku .i fo'a ca'o cadzu va'o leza'i smaji
ni'o xu mi'o cadzu ve'a piro le ve klama sei la tasos. baza cusku .i lu .a'i mi na'e se tcaci lezu'o cadzu li'u .i ko'u ru'u catlu le foldi be le fagyfesti vu'o noi ru'u preja le jimte be leka fo'a viska .i lu .uinai se badri li'u
.i piro le ve klama cu simsa ti sei la klaus. cusku
.i xi ty. lu .auru'e mi djica lenu do pu nenri le badydi'u ze'a lenu gunta li'u
.i lo drata pu kansa do va'o na'ebo lenu mi no'a sei la klaus. cusku
.i la tasos. cmila ca lenu setca le xance le dakli .i xi ty. lu pe'i .ie li'u
.i fo'a ca'o cadzu klama gi'e ru'i catlu le ganra foldi be le smaji fagyfesti noi sruri fo'a
ni'o ni'o le solri co'a canci .i la xendriks. goi ko'a masno klama le crane gi'e xance minde la tasos. joi la klaus. lenu stali .i la klaus. goi ko'i demtse gi'e punji le cecla zargu le loldi .i la tasos. goi ko'u cuxna le bliku be lo xumrkonkreto gi'e zutse ca lenu vasxu cmoni .i xi ty. lu .o'u xamgu fa lenu surla li'u
.i ko smaji sei la klaus. jursa cusku .i la xendriks. klama le galtu pe le cmana poi crane fo'a .i ri mintu le cmana poi le rusko bajra cu klama fo ke'a ze'a le zi cerni .i la xendriks. cpare sekai leka tcena kei gi'e pilno le reldarvistci lenu viska lei bancu .i po'o le fagyfesti .e so'u le tricu cu se viska .iku'i ca'u lo mitre be li su'e vomu ku se stuzi le vorme befo le crane ke minde badydi'u .i le badydi'u poi ko'a pu klama fi ke'a .i la xendriks. catlu sekai leka smaji .i noda muvdu .i noda sinxa leka jmive .i la klaus. mo'iga'u cpare lo lamji be ko'a .i xi ky. lu ma stuzi li'u
.i xi xy. lu ca'uni'aku li'u .i la xendriks. dunda le reldarvistci ky. i gunro dilnu lo fagyfesti le vanci tsani .i le terdi ca'o zenba leka manku .i leza'i se gusni cu cacra be li su'e so'u .ila'a mleca
.i mi na'e viska sei la klaus. cusku
.i xi xy. lu ta poi tricu .i le ricyzbe .i lamji le derxi be le takybli .i le vorme cu pritu lei takybli li'u
.i xi ky. lu .uanai mi bai lacri do li'u
.i xi xy. lu ko .e la tasos. jaigau bandu mi vi ti .i do'o kakne lenu viska ve'a ti bi'o le vorme li'u
.i xi ky. lu xu do zilpavykansa klama le cnita li'u
.i xi xy. lu va'o tu'a le mi ckiku mi ba snura .i le tumla poi sruri le badydi'u cu jmive foldi lai jgalu .i ri ni'ane'i jmaji lo fagyfesti .i simsa lo xasyjukni .i secau le ckiku do'o to'e kakne li'u
.i xi ky. lu la'a drani li'u
.i xi xy. lu mi ba ve'u masno cadzu .i co'i lenu mi birti sei se dicra li'u
.i xi ky. lu va'o leza'i jy. ni'a nenri le badydi'u kei do na'e kakne lenu xrukla ti .i jy. sutra .i do na djuno li'u
.i xi xy. lu do stidi ma li'u
.i la klaus. pensi .i xi ky. lu ju'onai ko gasnu lenu le sonci cu klama le sefta .ija'ebo do ca'a viska li'u
.i la xendriks. to'e setca le cradi le befsri gi'e lafmuvgau le bonmaksi .i xi xy. lu .e'u mi'o cfagau li'u
.i gau la klaus. sinxa fi la tasos. i ko'u certu cpare le mlana be le cmana le gapru seka'a le se diklo be ko'i .e ko'a .i lu xy. ba zilpavykansa klama lo cnita sei la klaus. cusku .i mi'o jaigau bandu xy. vi ti .i ko cecla fa'a le bancu zi lenu do viska lenu xy. co'a xrukla .i jy. pu'i sutra klama li'u
.i za'a do na'e pacna sei la tasos. cusku
.i xi ky. lu .e'i go'i li'u
.i la xendriks. ga'orgau le midju be le cecla gi'e lanli ra .i xi xy. lu la'aru'e su'oda xamgu li'u
.i xi ky. lu do na zgana lenu jy. pu co'e i so'onono jy. i roda mintu .i preja pa'a tu'a loi manti li'u
.i xi xy. lu .e'e la'a mi kakne lenu facki kei secau lenu mo'u klama .i la xendriks. telgau le cecla gi'e jgari ri fa'u le cradi pa le xance ku fa'u le drata .i lu co'o do'u ko pacna lenu mi snada li'u
.i la klaus. punji le xance .i xi ky. lu ko na'e klama le cnita pu lenu do birti .i ko benji tu fo ti .i ko jaigau bapli lonu tu jarco tu'a vo'a li'u
.i la xendriks. sanli .i ko'a mo'iga'u klama fo le cmana
ni'o ko'a masno cadzu mo'ifa'a le derxi be le takybli ku joi le festi be'o poi lamji le morsi ricyzbe .i mo'ifa'a le vorme be le crane ke minde badydi'u .i noda muvdu .i ko'a lafmuvgau le cradi gi'e sazri ri .i xi xy. lu doi skat. do'u xu do tirna mi li'u .i smaji .i lu ju'i skat. mi'e la xendriks. ike'u xu do tirna mi .i mi bartu le badydi'u .ila'a do kakne lenu viska mi sepi'o le viska tutci li'u .i ko'a tinju'i gi'e tagji jgari le cradi .i noda te benji .ipo'o savru .i ko'a mo'ica'u cadzu .i la jgalu cu kakpa klama fi le fagyfesti fe ko'a .i jy. jundi tadni ko'a .ibabo jy. se lidne ko'a tai lezu'o sinma ke gerku jersi va lo mitre be li so'u .ibazibo le remoi je barda me la jgalu cu co'a kansa .i sekai leka smaji kei lai jgalu cu se lidne ko'a ca leza'i ko'a masno klama le badydi'u
ni'o la xendriks. sisti .iti'abo lai jgalu cu go'i .i ko'a ca jibni .i pu'o snada le badydi'u serti .i xi xy. lu doi skat. do'u xu do tirna .i mi sanli lo gapru be do .i bartu .i ve'a le sefta .i xu do te benji li'u .i ko'a denpa fi leza'i jgari le cecla re'o le mlana gi'e go'i le cradi re'o le kerlo .i lo temci cu xaksu .i ko'a carmi troci lenu tirna .iku'i po'o smaji ja savru .ibabo di'e voi darno je jinme cu co'e
.i xi xo lu mi'e la skat. li'u
.i le voksa cu nutli .i to'e cinmo .i ko'a na'e kakne lenu te cmene le se voksa .iri'abo da'i le sance cabra cu mutce be leka cmalu .i xi xy. lu ju'i doi skat. mi sanli lo gapru be do .i mi zvati le sefta gi'e catlu le vorme pe le badydi'u li'u
.i xi xo lu je'e li'u
.i xi xy. lu xu do viska mi li'u
.i xi xo lu je'e li'u
.i xi xy. lu xu go'e sepi'o le viska tutci .i xu do fargau mi ra li'u
.i xi xo lu je'e li'u
.i la xendriks. pensi .i le djine be lai jgalu cu ru'u smaji denpa .i xi xy. lu xu roda xamgu ne'i le badydi'u .i xu no le to'e fadni cu fasnu li'u
.i xi xo lu roda xamgu li'u
.i xi xy. lu .e'o do klama le sefta .i mi djica lenu ze'i viska do li'u .i la xendriks. barda vasxu .i lu ko penmi mi ti .i mi djica lenu tavla do li'u
.i xi xo lu ko klama le cnita li'u
.i xi xy. lu mi minde do li'u .i smaji .i lu xu do co'a klama li'u .i la xendriks. tinju'i .i noda spuda .i lu ga'i mi minde do lenu klama le sefta li'u
.i xi xo lu ko klama le cnita li'u
.i gau la xendriks. tagji fa le xedja .i xi xy. lu ko gasnu lenu mi tavla la leones. li'u .i clani nu denpa .i ko'a tinju'i le savru .ibabo le voksa voi jdari je cinla je jinme cu te benji .i mintu le drata
.i xi xo lu mi'e la leones. li'u
.i xi xy. lu mi'e la xendriks. i mi zvati le sefta vi le vorme pe le badydi'u .i mi djica lenu pa do'o klama ti li'u
.i xi xo lu ko klama le cnita li'u
.i xi xy. lu le cnita ki'a .i .o'onai ga'i mi minde do li'u
.i smaji .i la xendriks. dzimuvgau le cradi .i ko'a jundi catlu lei sruri .i le vorme cu vi crane .iba'u lamji le jamfu .i ko'a dzimuvgau le bonmaksi gi'e lasna le cradi le befsri .i sekai leka jundi kei ko'a jgari le cecla lei re xance .i ko'a mo'ica'u klama tai lezu'o stapa ce'o stapa .i go jy. kakne lenu viska ko'a gi jy. djuno ledu'u ko'a klama le vorme .i gau ko'a ze'i gacri lei kanla .ibabo ko'a punji le jamfu le te serti poi traji leka galtu .i re la davyd. klama ko'a .i le'i flira cu simxu mintu gi'e to'e se cinmo cusku .i gau ko'a le remei cu spoja le pulce .i le za'umei goi fo'i cu sutra je smaji klama .i fo'i cu gunma bende dy. i lu'i ro fo'i simxu mintu .i la xendriks. cargau gi'e bajra klama fi le badydi'u fe le cmana
ni'o ve'a le cmana la tasos. e la klaus. cu cecla fa'a le cnita .i lei cmalu me la jgalu cu co'a lindi klama ru .i le minra ke jinme bolci cu sutra je fenki klama fo le fagyfesti .iku'i leda'i nu ko'a jundi la'edi'u cu ckape .i ko'a cidytse gi'e fargau le vorme .i le cecla cu lamji le flira .i la davyd. mo'ize'o klama tai lei girzu gi'e jgari le me la tedis. cribe .i le cinla tuple cu slilu ca lenu dy. bajra klama fo le serti fe le sefta .i la xendriks. cecla fa'a le ralju gunma .i dy. spoja tai lonu le xislu .e le punsarlu cu se renro fi roda .i ko'a ca'o cecla pa'o lei dilnu be lo pulce .i le barda je masno xadni cu pagre le badydi'u vorme .i le go'i cu clani gi'e milxe leka slilu .i la xendriks. denpa fi leza'i manci le nanmu po'u le sonci bepa'u papo'o le tuple zi'e noi se sarji le grana .i lu doi cibmoij. li'u .i voksa la tasos. i ca'o nu cecla .i le barda mo'ica'u klama fi'o sruri lai davyd. noi se jicla .i la xendriks. sisti lepe'a za'i dunja .i la pamoi klesi .i la selxai sonci .i ko'a fargau gi'e cecla .i le sonci cu spoja lei spisa tai lonu le pagbu .e le clupa cu se renro .icabo so'i la davyd. zvati le pinta loldi va le badydi'u .i ko'a cecla ce'o cecla .i ko'a masno klama le trixe ca'o leza'i xadba demtse gi'e fargau .i ve'a le cmana la klaus. cecla .i le mlana be ra cu se pilka lai jgalu poi ca'o klama le gapru .i la xendriks. xrukla le cmana fo lezu'o bajra ce'o demtse .i la tasos. ba'o cliva la klaus. gi'e masno ke sruri klama le pritu .i ko'u muvdu mo'ito'o le cmana .i la davyd. klama ko'a .i le cmalu ke blaci flira cu na'e jarco leka cinmo .i le bunre kerfa cu dandu ca'u le kanla .i suksa fa lenu dy. korcu gi'e kargau lei birka .i le cribe pe dy. farlu gi'e plipe klama fo le loldi fe ko'a .i la xendriks. cecla .i le cribe .e la davyd. canci .i ko'a cisma gi'e spaji .i ti simsa lo se senva .i lu ga'uviku li'u .i voksa la tasos. i la xendriks. masno klama ko'u noi jibni so'o le kamju be lo xumrkonkreto be'o noi bitmu befo le spofu dinju .i ko'u cecla ze'o ko'a sepi'o le cmacelxa'i poi se dunda la klaus. .i xi xy. lu ki'e li'u .i ko'a mo'u klama ko'u gi'e carmi vasxu .i ko'u lacpu ko'a seka'a le trixe be lei xumrkonkreto gi'e pencu ve'i le ko'u befsri .i xi ty. lu ko jai gacri le kanla li'u .i ko'u to'e lasna le bolci le xadmidju .i sekai leka sutra kei ko'a vimcu le gacri gi'e telgau ri .i lu ko jai gacri le kanla gi'e dizlo li'u .i ko'u renro le jbama .i ri bargu pa'a lenu se ke certu renro kei gi'e plipe gunro le vorme pe le badydi'u .i re la selxai sonci cu cfipu sanli vi le derxi be le takybli .i za'u lai davyd. mo'ize'o flecu fo le trixe fi le foldi .i pa la selxai sonci cu klama le jbama gi'e juxre korcu tezu'e lenu crepu .i le jbama cu spoja .i la'edi'u rinka lenu la xendriks. carna kei gi'e renro ko'a le loldi .i le glare brife cu preja ko'a .i ko'a ruble viska la tasos. noi sanli ti'a lei kamju gi'e cecla sekai leka masno je certu kei fa'a lai davyd. poi klama fi lei carmi dilnu be le blaci fagri
ni'o vave'a le cmana la klaus. damba le djine be lai jgalu vu'o poi sruri be ky. muvdu .i ky. xrukla gi'e cecla fa'a jy. gi'e klama le trixe .i troci lenu rivbi tu'a le djine
ni'o la xendriks. gunka lenu sanli .i le stedu cu se cortu .i ko'a ruble leka viska .i roda pencu ko'a gi'e krixa je carmi bo se jicla .i le pritu birka cu na kakne lenu muvdu
ni'o la tasos. xrukla ko'a .i lu ju'i do'u ko kankla li'u
.i xi xy. lu la klaus. i ky. za'o gapru li'u
.i xi ty. lu .aicai ko kankla li'u .i la tasos. cpumuvgau la xendriks. le trixe lei kamju .i la xendriks. desygau le stedu tezu'e lenu zenba leka sanji .i la tasos. gidva ko'a lenu sutra cliva .i le kanla be ko'u cu carmi .i ko'u zgana la jgalu poi da'i rivbi lenu spoja .i pa la davyd. klama fi le gunro dilnu be lo fagri .i la tasos. daspo dy. i noda ba klama
ni'o lu ku'i la klaus. i .ei ma srana ky. li'u se cusku la xendriks. .i ko'a denpa fi leza'i to'e stodi sanli .i lu ky. li'u sei se dicra
.i xi ty. lu ko kankla li'u
ni'o ko'a .e ko'u xrukla fi le badydi'u .i zmadu ce'o zmadu leka darno .i so'u la jgalu cu ze'i jersi gi'e ba sisti .i jy. carna gi'e cliva .izubo la tasos. sisti .i xi ty. lu .e'u mi'o vi denpa fi leza'i vasxu li'u
.i la xendriks. zutse lei derxi be lo festi .i ko'a satre lumci le cnebo ca lenu carmi vasxu .i xi xy. lu .uu mi'o cirko la klaus. le trixe li'u .i la tasos. na'e cusku .i ko'u kargau le cecla gi'e setca le cnino ke danti bakfu ri .i la xendriks. catlu ko'u sekai leka se jenca .i xi xy. lu do zu'e cirko ky. le trixe li'u .i la tasos. bikla zbasu le cecla .i ko'u catlu lei derxi be lo rokci festi poi sruri .i le flira cu na'e jarco leka cinmo .i ko'u simlu leka sisku da .i lu ma fasnu sei la xendriks. reisku .i do sisku ma .i xu da klama ti li'u .i ko'a desygau le stedu gi'e troci lenu jimpe .i .u'e ko'u zukte ma .i ko'u denpa ma .i ko'a zgana no lo to'e fadni .i lo fagyfesti cu ve'u sruri .i fagyfesti joi dinju bo festi .i fe'edi'inai stani lo tricu secau lo pezli .e lo jimca .i lu ma sei se dicra li'u
.i la tasos. zunti cusku lu ko smaji li'u .i ko'u carmi catlu .i le cecla pe ko'u se lafti .i la xendriks. carna gi'e sisku leka ko'u catlu ce'u .i ve'a le pu ve klama le xadni goi ko'i cu to'e canci .i ko'i ca'o na'e lanxe dzukla ra .i lei taxfu pe ko'i se xrani .i ko'i cadzu fi le se xrani sekai leka mutce leka masno je jundi .i ru'inai denpa fi leza'i surla gi'e zenba leka vlipa .i paroiku ko'i jibni lenu farlu .i ko'i ze'i sanli ca lenu troci leza'i lanxe .ibabo ko'i klama .i ko'i du la klaus. .i la xendriks. sanli .i xi xy. lu doi klaus. li'u .i ko'a co'a klama ko'i .i lu .u'ecai ta'i ma do li'u sei se dicra .i la tasos. cecla .i la xendriks. mo'iti'a bikla .i ko'u za'uroi cecla .i spoja zo'a la xendriks tai le jelca linji .i le nenli'i cu te darxi la klaus. fo le cutne .i ky. spoja lo denxi'u .e lo xislu .i ky. ze'i za'o cadzu .ibabo ky. slilu gi'e janli le loldi .i le birka cu preja .i so'u lo xislu cu gunro .i smaji .i la tasos. carna fi la xendriks. i xi ty. lu .uo caku do jimpe ledu'u makau mukti lenu ky. catra la rudis. li'u .i la xendriks. masno zutse .i ko'a desygau le stedu .i ko'a na'e cinmo .i ko'a na'e kakne lonu pensi .i lu .o'onai xu do zgana sei la tasos. cusku .i xu do jimpe li'u .i la xendriks. na'e cusku .i roda sakli cliva ko'a .i zmadu ce'o zmadu leka sutra .i le manku cu gunro gi'e pencu .i gau ko'a gacri le kanla
ni'o ni'o la xendriks. goi ko'a masno tolgaigau le kanla .i le xadni cu cortu roda .i ko'a troci loza'i zutse .iku'i lei jesni be le cortu cu tunta le birka .e le janco .i ko'a vasxu cmoni
.i ko na'e troci lonu gapru sei la tasos. goi ko'u cusku .i ko'u korcu gi'e punji le lenku xance le mebri .i ca nicte .i so'u le tarci cu gapru gi'e te gusni pa'o lei preja dilnu be lo fagyfesti .i la xendriks. vreta .i le xedja cu se stela ganlo .i la tasos. no'e cinmo catlu ko'a .i ko'u ba'o zbasu le fagri be lei mudri ku joi lei cicyspa .i le fagri cu ruble gi'e sincysna re'o le kabri befi lo jinme vu'o poi ga'u dandu .i mu'unai la'edi'u roda smaji .i na'e muvdu manku ze'ove'a le fagri
.i .u'e ky. cmima la remoi klesi sei la xendriks. smaji cusku
.i xi ty. lu mi ze'e jinvi la'edi'u li'u
.i xi xy. lu ki'u ma do na'e puzu daspo ky. li'u .i ko'a djica leza'i djuno
.i xi ty. lu do pu jai fanta li'u .i la tasos. klama le fagri gi'e catlu le jinme kabri .i lu ckafi .i ti baza bredi lonu pinxe li'u .i ko'u xrukla gi'e zutse vi ko'a .ibazabo ko'u kargau le cmacelxa'i gi'e co'a to'e zbasu le cecla cabra .i ko'u jundi tadni ri .i lu .i'e ti melbi cecla sei ko'u smaji cusku .i traji leka se ke certu zbasu li'u
.i xi xy. lu .o'unai jy. mo .i la jgalu li'u
.i xi ty. lu lenu darxi kei pe le jbama cu rinka leza'i jy. to'e kakne .i jy. ralci .i mutce leka ganzu pe'i li'u
.i xi xy. lu xu lai davyd. simsa li'u
.i xi ty. lu go'i li'u
.i xi xy. lu ri'a ma do pu ponse le jbama li'u
.i la tasos. jangalgau .i xi ty. lu mi'a pluta fi tu'a ta .i ko na'e mleca te vamji le mi'a tutci larcu doi cibmoij. i secau le jbama do .e mi ca na'e zasti li'u
.i xi xy. lu .i'e mutce leka plixau li'u
.i la tasos. tengau le tuple gi'e glagau le jamfu ra'i le fagri glare .i xi ty. lu mi pu se spaji leza'i do simlu leka na'e jimpe kei ba lenu ky. catra la rudis. i .uanai ki'u ma do pu jinvi sei se dicra li'u
.i xi xy. lu mi ba'o ciksi .i mi pu jinvi ledu'u ky. terpa li'u
.i xi ty. lu .uesai .i doi cibmoij. i'u mi puze'i fuzyji'i do .iki'ubo do na'e curmi lenu mi catra ky. i mi jinvi ledu'u la'a do jai bandu ky. li'u .i ko'u cmila
ni'o la xendriks. cusku lu xu mi'o ve'i snura li'u
.i xi ty. lu ze'a go'i pu lenu jy. jo'u lei zmadu bera'i lo drata canlu cu jmaji li'u .i la tasos. co'a lumci le nenri be le cecla le spisa be lo taxfu .i ko'u mulgau gi'e catke setca le cabra .i ko'u ga'orgau le cecla gi'e satre le tubnu le degji
.i mi'o pu se xaurfu'a sei la xendriks. smaji cusku
.i xi ty. lu .ie mutce leka xaurfu'a li'u
.i xi xy. lu mi ckire lenu do pu lacpu mi li'u .i la tasos. na'e spuda .i ko'u ze'i catlu ko'a sepi'o le kanla noi minra le fagri gusni .i la xendriks. catlu le ko'a birka .i ko'a na'e kakne lenu le degji cu muvdu .i piro le mlana be le xadni cu na'e ganse .i ni'ane'i kandi je stodi cortu
.i xi ty. lu xu do cortu li'u
.i xi xy. lu le mi birka cu se xrani li'u
.i xi ty. lu xu da drata li'u
.i xi xy. lu lo nenri se xrani li'u
.i xi ty. lu .uu do na'e dizlo ca lenu le jbama cu spoja li'u
.i la xendriks. na'e cusku .i ko'a catlu lenu la tasos. setca le ckafi ra'i le kabri le palne befi lo jinme .i ko'u bevri ra ko'a .i xi xy. lu ki'e li'u .i ko'a korcu fi'o se banzu lonu pinxe .i nandu fa lonu tunlo .i lei canti cu carna .isemu'ibo ko'a catke le palne .i lu .uo mi na ca'o pinxe li'u .i la tasos. pinxe le ve vimcu .i lo temci cu xaksu .i lei dilnu be lo fagyfesti ga'u muvdu ve'a le manku tsani .i la xendriks. vreta sekai leka menli kunti .ibazabo ko'a sanji leza'i la tasos. ga'u sanli gi'e catlu ko'a .i ma fasnu sei ko'a smaji cusku
.i xi ty. lu xu do zenba leka kanro li'u
.i xi xy. lu .ieru'e li'u
.i xi ty. lu .iepei doi cibmoij. va'oda'i lenu mi na bevri do kei jy. pu catra do .i do nu'o morsi pa'a la rudis. li'u
.i xi xy. lu .ie mi djuno li'u
.i xi ty. lu xu do djica lenu cilre fi le krinu be lenu mi bevri do .i mi pu kakne lenu cliva do .i mi pu kakne lenu do stali tu li'u
.i xi xy. lu ki'u ma do pu bevri mi li'u
.i xi ty. lu .iki'ubo sarcu fa lenu mi'o cliva ti li'u .i gau la tasos. le grana cu jicla le fagri ca leza'i to'e xanka catlu ra .i lu no lo remna ka'e renvi ve'u ti .i lenu le za'umei pe jy. cu klama cu fanmo tu'a mi'o .i mi pensi ca'o leza'i do to'e sanji .ila'a le purci be lenu jy. zvati ti cu cacra li ci li'u
.i xi xy. lu xu do lacri mi lenu mi'o rivbi li'u
.i xi ty. lu .ie mi lacri do lenu cliva li'u
.i xi xy. lu mi co'e ki'u ma li'u
.i xi ty. lu leza'i mi na'e djuno fi lo tadji li'u .i le kanla cu minra le xadba gusni ko'a .i carmi je stodi .i lu go do ba nu'o zukte lenu mi'o cliva kei gi jy. catra mi'o za lo cacra be li ci .i mi sanji no lo drata .i .a'oru'e doi cibmoij. do ba zukte ma .i mi denpa ze'a piro le nicte .i mi vi zutse ca'o leza'i do to'e sanji kei gi'e denpa gi'e tinju'i .i bazi murse .i leza'i nicte pu'o mulno li'u
.i la xendriks. pensi .i ti cizra sei ko'a za cusku
.i xi ty. lu .uanai ma cizra li'u
.i xi xy. lu lesi'o do krici ledu'u mi kakne lenu mi'o cliva .i .u'e do krici ledu'u mi kakne ma li'u
.i xi ty. lu xu do kakne lenu mi'o zvati le lunra jemyzda li'u
.i xi xy. lu .ue le lunra jemyzda .i ta'i ma li'u
.i xi ty. lu ju'o su'o da tadji li'u
.i la xendriks. desygau le stedu .i xi xy. lu .ienai mi na djuno fi lo tadji li'u
.i la tasos. na'e cusku .i ze'iku le ko'u catlu cu jdika leka stodi .i ko'u dzimuvgau le stedu gi'e suksa carna fi na'ebo ko'a .i ko'u kalsa sanli .i xi ty. lu xu za'uroi pinxe li'u
.i xi xy. lu na go'i li'u
.i lu .i'a li'u .i la tasos. smaji pinxe .i ko'a na'e kakne lonu viska le flira .i ko'a di'a vreta le loldi ca leza'i pensi gi'e troci leza'i jundi .i nandu fa lezu'o pensi .i le stedu ca'o cortu .iji'a leza'i to'e sanji se jenca kei ca'o gacri ko'a
.i pe'iru'e pa da tadji sei ko'a suksa cusku
.i xi ty. lu .a'u re'i li'u
.i xi xy. lu lenu murse cu balvi ma li'u
.i xi ty. lu lo cacra be li re .i le solri bazi tolcanci li'u
.i xi xy. lu lo marce cu jibni ti .i mi na pu viska my. iku'i mi djuno ledu'u my. zasti li'u
.i xi ty. lu .a'u le marce cu mo li'u .i le voksa pe ko'u ckaji leka jursa
.i xi xy. lu jakne marce li'u
.i xi ty. lu xu my. ka'e klama .i xu go'i le lunra jemyzda li'u
.i xi xy. lu .ie la'edi'u te platu .i se tcini leza'i carmi ckape li'u .i ko'a satre le mebri
.i xi ty. lu ma raktu li'u
.i xi xy. lu .oi le stedu .i lenu pensi cu nandu .i je'aru'e .y. je'aru'e jundi .i le jbama li'u
.i xi ty. lu xu le marce cu jibni ti li'u .i la tasos. klama le lamji be ko'a gi'e demtse .i lu .i .a'u ma du leni jy. jibni .i jy. diklo ma li'u
.i xi xy. lu .oi mi troci lenu pensi li'u
.i le degji be ko'u cu carmi jgari le birka .i xi ty. lu xu jibni sei le voksa cu simlu be leka tirse .i ma se diklo jy. i xu my. se sorcu ni'a le tumla .i xu lolni'a se mipri li'u
.i xi xy. lu go'i .i nenri lo te sorcu tanxe li'u
.i xi ty. lu ta'i ma mi'o facki fi my. i xu my. se tcita .i xu da tcita befi lu'e lo namcu cmene be my. li'u
.i la xendriks. jundi .i xi xy. lu na go'i .i noda namcu cmene li'u
.i xi ty. lu .o'onai ja'eku mo li'u
.i xi xy. lu lo sinxa li'u
.i xi ty. lu le sinxa cu mo li'u .i la xendriks. na'e spuda .i va'o leza'i na'e stodi gusni kei le kanla cu simlu leka blaci ke na'e viska bolci .i le degji be la tasos. cu jgari le birka .i xi ty. lu ma se ckaji le sixna .i ri mo li'u
.i xi xy. lu mi .y. mi na'e pensi .i .e'o mi vreta li'u
.i xi ty. lu .ie li'u .i ko'u to'e jgari gi'e sanli .i la xendriks. vreta le loldi .i le kanla cu se gacri .i la tasos. cadzu mo'ito'o ko'a .i le xance cu nenri le daski .i ko'a tikpa vimcu lo rokci gi'e sanli ca lenu catlu le tsani .i le nicte xekri co'a kandi binxo le grusi .i leza'i cerni cu bazi cfari
.i la tasos. jgari le cmacelxa'i gi'e cadzu mo'iru'u le fagri .i trixe ce'o crane .i la xendriks. na'e muvdu vreta le loldi .i le kanla cu se gacri .i le grusi cu preja le tsani .i zmadu ce'o zmadu leka galtu .i le tumji'u co'a se viska .i loi foldi be lo fagyfesti cu preja ro lo farna .i lo fagyfesti .e lo spisa be lo dinju .i lo bitmu cu cunso fatri .i lo derxi be lo xumrkonkreto .i lo lunbe stani be lo tricu .i le vacri cu lenku je kinli .i le cipni vu bacru so'u le badri sance .i la xendriks. cikna desku .i ko'a tolgaigau le kanla .i xi xy. lu xu murse caku li'u
.i xi ty. lu go'i li'u
.i la xendriks. zenba leka vreta jganu kei le cmalu .i xi xy. lu .uanai do pu djica lenu djuno da .i do pu reisku fi mi li'u
.i xi ty. lu xu do ca morji li'u
.i xi xy. lu go'i li'u
.i xi ty. lu ma stuzi sei ko'u tinsa .i .o'onai ma sei ko'u za'uroi cusku li'u
.i xi xy. lu lo jinto .i lo se xrani jinto .i my. se tanxe ni'a lo jinto li'u
.i xi ty. lu .ua lo jinto sei la tasos. surla .i mi'o .ai ba facki fi lo jinto li'u .i ko'u catlu le junla .i lu lo cacra be li ji'i pa cu temci sera'a mi'o doi cibmoij. i pe'ipei mi'o kakne lenu facki kei pu lo cacra li'u
.i .e'o ko sidju fi lenu sanli sei la xendriks. cusku
.i la tasos. setca le cmacelxa'i gi'e sidju ko'a .i xi ty. lu zo'e ba nandu li'u
.i xi xy. lu .ie go'i li'u .i gau la xendriks. tagji fa le ctebi .i lu pe'i mi'o klama na'ebo lo darno .a'onai li'u
ni'o le remei goi fo'a co'a cadzu .i tu'a le clira solri cu rinka leza'i fo'a milxe leka glare .i le tumla cu pinta gi'e kunti .i ri ru'u ve'u preja tai le grusi je to'e jmive .i so'u lo cipni ga'uvu smaji vofli gi'e masno litru lo cukla
.i lu xu do viska da sei ko'a cusku i xu la jgalu li'u
.i xi ty. lu na go'i li'u
ni'o fo'a klama fo so'o lei dinju festi .i sirji bo xumrkonkreto joi takybli .i le xumrkonkreto jicmu .i le ratcu cu bajra cliva .i la tasos. mo'ito'o plipe sekai leka ckape jundi
.i xi xy. lu ti pu tcadu sei la xendriks. cusku .i lo cmatca .i nurma cmatca .i ti ve'u jbari nurma puku .i le se zvati be mi'o li'u
ni'o fo'a klama fo le spofu klaji noi kalsa se kruca lei cicyspa .e lei fenra .iri'ubo le danmo tubnu be lo rokci cu tunta
.i ko jundi sei ko'a kajde cusku
.i le kevna po'u le to'e se gacri lolnitku'a cu tcena .i tunta fa lei tubnu jipno noi rufsu gi'e korcu .i fo'a klama va le pagbu be le zdani .i .i le lumci patxu noi mlana vreta .i le spofu stizu .i so'u le smuci ku joi le spisa be le staku palta .i ve'a le midju be le klaji le loldi pu farlu .i le kevna cu culno lei cicyspa joi festi joi bongu
.i vi ti co'e sei la xendriks. smaji cusku
.i xi ty. lu xu klama fo ti li'u
.i xi xy. lu go'i fo le pritu li'u
.i fo'a jibni le ve vimcu befo le tsali cakykarce .i le gasyca'a pe la xendriks. se sance sekai leka kajde .i le cakykarce ba'o se ke dirce spoja daspo .i vi le cakykarce ku preja vreta fa le sudga xadni noi se moklu le kalri .i pinta foldi ze'o le klaji .i rokci joi cicyspa joi spisa be lo blaci .i tu sei ko'a cusku .i le jinto besema'e lo rokci cu tunta .i le go'i cu korcu gi'e spofu .i so'u le tanbo cu gacri .i so'e le bitmu cu porpi lei rokci .i la xendriks. to'e stodi klama le jinto .i la tasos. kansa
.i lu xu do birti tu'a ti sei la tasos. cusku .i ti na'e simlu leka vajni li'u
.i xi xy. lu mi birti li'u .i la xendriks. zutse vi le korbi be le jinto .i lei denci cu tagji .i ko'a ca'a sutra lezu'o vasxu .i ko'a satre lumci le flira lo xasne .i lu ti gau bredi lenu le minde sonralju cu rivbi va'o lonu ckape .i va'o leda'i nu le badydi'u cu se kavbu
.i xi ty. lu xu do pu du le minde sonralju li'u
.i xi xy. lu go'i li'u
.i xi ty. lu le marce cu zvati ma .i xu my. jibni li'u
.i xi xy. lu mi'o sanli my. li'u .i ko'a satre le sefta be le jinto rokci le xance .i lu le kanla stela cu spuda mi .ije go'i no lo drata .i tu'a le marce cu steci mi .ija la'edi'u te pluta li'u .i zo klik. suksa sance .izibo fo'a tirna lenu dizlo ke mosra sance kei ra'i le cnita .i ko rivbi sei ko'a cusku .i fo'a muvdu mo'ito'o le jinto .i le pagbu be le loldi cu sakli muvdu .i le jinme greku cu pagre lei fagyfesti gi'e catke vimcu lei takybli .e lei cicyspa .i lenu muvdu cu sisti ca lenu le marce cu se viska .i lu .ua ta co'e li'u se cusku ko'a .i le marce cu cmalu .i ri smaji gi'e dandu fi le se jivbu greku pa'a le to'e kinli jesni .i le fagyfesti cu carvi le manku kevna poi le marce ba'o cliva .i la xendriks. klama my. i ko'a cpare le greku gi'e klupe vimcu le gacri tai lenu mo'ize'o lacpu .i ko'a ne'i viska le jitro cabra .e le snura stizu
.i la tasos. klama gi'e sanli vi la xendriks. i ko'u catlu le nenri be le marce .i mi na'e se tcaci lezu'o jakne marce gidva sei ko'u za cusku
.i la xendriks. ze'i catlu ko'u .i xi xy. lu mi ba gidva li'u
.i xi ty. lu .ue xu go'i .i po'o pa lo stizu cu co'e doi cibmoij. iza'a platu fi leza'i ti bevri papo'o lo prenu li'u
.i lezu'o la xendriks. vasxu cu cenba .i ko'a catlu le nenri be le marce sekai leka jundi .i le se jinvi be la tasos. cu drani .i le marce ka'e bevri papo'o lo prenu .i xi xy. lu mi jimpe sei ko'a masno cusku .i le pa prenu cu du do li'u
.i ko'u stedu slilu .i xi ty. lu ju'o go'i li'u
.i xi xy. lu .uanai ki'u ma li'u
.i xi ty. lu do na'e kakne lenu klama .ila'a do na renvi ra .i do selxai gi'e la'a na'e snada tu li'u
.i xi xy. lu ta cinri se darlu .iku'i mi djuno fi le stuzi be le lunra jemyzda .ije do na go'i .ila'a do ba litru ze'a lo masti be li so'u gi'e na'e facki .i ly.jy. mutce be leka se mipri .i va'o leza'i na'e djuno fi lei sinxa sei se dicra li'u
.i xi ty. lu .ai mi troci .ila'aru'e mi ba na'e facki .ijo mi zilpavykansa .iku'i pe'i do dunda ro le datni poi mi nitcu .i do lacri zo'e leza'i do jmive li'u
.i xi xy. lu mi lacri ki'a li'u
.i xi ty. lu go mi zi facki fi le lunra jemyzda gi la'a mi jai mukti lenu tu benji lo marce tezu'e lenu ri bevri do .i co'e ba'e va'o lenu mi zi facki le jemyzda .i va'onai zo'e tu'a do fanmo .iru'a loi se sabji cu nenri le marce .i .e'e ra se sabji fi mi za le banzu sei se dicra li'u
.i la xendriks. sutra muvdu .iku'i leza'i selxai birka cu tcica ko'a .i la tasos. korcu gi'e sakli rivbi .i le ko'u xance cu se lafti serai leka sutra .i la xendriks. viska lenu le cecla zargu mo'ifa'a muvdu .i ko'a troci lenu bandu fi lenu darxi .iku'i leni sutra cu dukse .i le jinme zargu cu darxi fo le mlana be le stedu .i vi gapru le kerlo .i lenu cortu cu flecu ko'a .i lenu cortu .e lenu gunro dilnu lo manku cu go'i .i ko'a sakli farlu le loldi
ni'o ko'a milxe leka sanji leza'i la tasos. sanli ga'u ko'a gi'e tikpa ri fo le degji .i xi ty. lu doi cibmoij. ko cikna li'u .i ko'a tolgaigau le kanla ca lenu cmoni .i lu ju'i li'u .i ko'u korcu .i le cecla cu se farna le ko'a flira .i lu leka sutra cu sarcu .i jdika leni temci .i le marce cu bredi .iku'i do bilga lenu dunda le datni poi mi nitcu kei pu lenu mi cliva li'u .i la xendriks. desygau le stedu gi'e troci lenu zenba leka sanji .i lu .o'onai ko sutra .i ma stuzi le lunra jemyzda .i ta'i ma mi facki .i mi ba sisku ma li'u .i la xendriks. na'e cusku .i lu .e'ocai ko spuda li'u
.i xi xy. lu .u'u li'u
.i xi ty. lu doi cibmoij. le marce cu bevri lei se sabji .i mi nu'o litru ze'a lo jeftu be li so'o .i .ai mi ba facki fi le jemyzda .ije ba lo mentu be li cino do morsi .i le po'o tadji lenu do renvi sei se dicra li'u .i ko'u sisti .i ve'a le cmana vi lei dinju spisa da muvdu .i da nenri le fagyfesti .i la tasos. sutra carna gi'e fargau .i ko'u cecla .i le dilnu be lo fagri cu plipe .i da mo'ize'o cpare gi'e gunro le fagyfesti .i ko'u za'uroi cecla .i la jgalu cu spoja .i lei xislu cu se renro .i lu za'apei sei la tasos. cusku .i lo sisku .i zo'e na'e clani li'u
.i xi xy. lu xu do benji tu tezu'e lenu bevri mi li'u
.i xi ty. lu go'i .i traji be leka sutra li'u
.i la xendriks. jundi catlu ko'u .i xi xy. lu xu do stace li'u .i le flira be ko'a cu jarco leka cizra se cinmo .i ka carmi djica .i lu xu do xrukla tezu'e tu'a mi .i xu .aucai do jai rinka lenu mi snada le lunra jemyzda li'u
.i xi ty. lu mi jai rinka lenu do snada .iku'i ko cusku le sedu'u ly.jy. zvati makau .i .o'onai le temci cu tordu li'u
.i xi xy. lu vi'o li'u .i la xendriks. lebna le rokci gi'e lacpu be vo'a zutse .i lu ko zgana li'u .i la xendriks. co'a sraku le fagyfesti .i la tasos. vi sanli gi'e catlu leza'i le rokci cu muvdu .i la xendriks. te pixra le na'e satci cartu be le lunra .i lu ti sinxa lai .apenin.cmanas. i ti go'i le me la .arximidis. kevna .i le lunra jemyzda cu bancu le fanmo be la .apenin. va lo ki'otre be li ji'i cinono .i mi na'e satci djuno fi le stuzi .i noda pe la teras. cu djuno .iku'i ca lenu do gapru la .apenin. kei ko jarco tu'a pa le xunre ke sinxa spoja ku ce'o le crino ku ce'o re le xunre tai lenu sutra porsi .i gau le jemyzda zgana cu ganse fi tu'a le do sinxa .i le jemyzda cu cnita le tumla ju'o .i tu gidva do lenu dizlo kei sepi'o lo maksi te jgari li'u
.i xi ty. lu le jitro cabra cu mo .i xu mi kakne lenu sazri ra li'u
.i xi xy. lu le cabra cu jibni fi leka zmiku .i po'o sarcu fa lenu do zukte tu'a le drani sinxa za le drani tcika li'u
.i xi ty. lu vi'o li'u
.i xi xy. lu le stizu ka'e cokcu piso'e lenu cecla danre .i le jitro be le vacri .e leka kelvo cu zmiku .i le marce ba cliva la teras. le kensa .i my. se farna le lunra gi'e co'a mluni ri va lo ki'otre be li ji'i pamuno .i do ba muvdu lo gapru be le jemyzda .i ca lenu do nenri le canlu be la .apenin. kei ko cecla lei sinxa jakne li'u
.i la tasos. sakli nerkla le marce gi'e zutse le snura stizu .i lei birka stela cu zmiku sruri ko'u .i ko'u pencu le jitro cabra .i xi ty. lu .uu do na'e klama doi cibmoij. i roti pu se sabji do .ije do na'e kakne lenu litru li'u
.i xi xy. lu ko dunda le cmacelxa'i mi li'u
.i la tasos. to'e setca le cmacelxa'i le befsri .i ko'u jgari ra le xance sekai leka pensi .i xi ty. lu ko na'e klama lo darno be le vi canlu .i lenu facki fi do cu nandu fi le do'anai cabna li'u
.i xi xy. lu vi'o .i mi vi stali le jinto li'u
.i la tasos. jgari le cabra gi'e satre le xutla jinme le degji .i xi ty. lu .i'osai le melbi marce doi cibmoij. i xamgu se zbasu .i mi sinma le do'o ka zbasu .i .io do'o ze'e finti lo xamgu .i do'o zbasu lo melbi .i .uinai lei se gunka no'u lei se finti be do'o cu traji leka banli kei fo le'i do'o snada li'u
.i .o'onai ko dunda le cmacelxa'i mi sei la xendriks. cusku ca lenu tcena fa le xance .i ko'a gunka lenu sanli
.i xi ty. lu co'o cibmoij. li'u .i la tasos. renro le cmacelxa'i goi fo'o le bancu be la xendriks. i fo'o cu sance darxi gi'e mo'ito'o gunro .i ko'a sutra jersi .ibazibo ko'a korcu gi'e crepu fo'o
ni'o le gacri be le marce cu jinme sance ganlo .i le klupe cu setca .i la xendriks. xrukla .i le nenri gacri ca'o se stela .i ko'a lafmuvgau le cmacelxa'i ca lenu desku
.i spoja ke cladu sance .i le marce cu se cecla to'e setca le jinme se rinju seri'a lenu runme fa le greku noi trixe .i la xendriks. korcu gi'e mo'iti'a muvdu .i le marce cu sutra klama mo'ipa'o lei gunro dilnu be lo fagyfesti gi'e canci mo'ine'i le tsani
ni'o la xendriks. ze'u sanli je catlu pu lenu ledo'a danmo cu canci .i noda muvdu .i le cerni vacri cu lenku gi'e smaji .i ko'a co'a dzukla fo le pu ve klama ne fo'a sekai leka to'e zukte .i xagmau fa leza'i ru'i muvdu .i lo sidju cu bazu klama .ijo ri ca'a klama
ni'o ko'a sisku ve'i lei daski pu'o lenu facki fi le bakfu be le sigja .i ko'a jelgau pa zo'e sekai leka badri jundi .i roda pu djica lonu ko'a dunda lo sigja .iku'i lo sigja cu rirci
ni'o le respa cu litru le fagyfesti vi ko'a .i ko'a sisti gi'e trati .i le respa cu canci .i ga'uku le solri cu zenba leka galtu .i le sfani cu denpa fi tu'a le pinta rokci poi mlana ko'a .i la xendriks. tikpa fa'a sy. fi le jamfu .i zenba leka glare .i lo xasne cu flecu mo'ire'o le flira fi le karbi .i le moklu cu sudga
ni'o zaku ko'a sisti lezu'o cadzu gi'e zutse le festi .i ko'a to'e lasna le mikce tanxe gi'e citka so'u le xukmi bakfu .i ko'a sruri catlu .i .uanai ko'a zvati ma .i da vreta ca'uku .i tcena ve'i le loldi .i smaji gi'e to'e muvdu .i la xendriks. sutra to'e setca le cecla .i ta simlu leka remna .ibazibo ko'a morji .i ta xadni la klaus. i la remoi klesi .i zvati da pe lenu la tasos. pu spoja darxi ky. i ko'a viska le xislu ku joi le clupa ku joi le jinme pagbu vu'o noi ve'a cunso fatri .i minra le solri gusni .i ko'a sanli gi'e klama ta .i ko'a pencu le to'e muvdu xadni le jamfu .i ra vi carna .i ko'a viska le jinme greku pa'u lei jinmrmalume cutybo'u joi grana .i le cilta mo'ize'o farlu pa'a le canti .i derxi be le cilta ku joi le batke ku joi le clupa .i ci'imei le'i matra ku jo'e le'i grana .i ko'a korcu .i le calku be le besna ba'o se daspo lenu farlu .i le rutni besna cu se viska .i ko'a catlu ri .i jgena be lei clupa .i le cmalu tubnu .i le cilta noi simsa lo kerfa leka cinla .i ko'a pencu le calku be le besna .i le go'i cu kalri .i le tcita befi le klesi cu se viska .i la xendriks. catlu le tcita .ije binxo leka terpa blaci .i lu vopi'emu li'u .i ko'a ze'u catlu le tcita .i la vomoi klesi .i na'ebo la remoi .i zo'e pu to'e drani .i leni klesi cu zmadu .i na'ebo lipo'o ci .i zmadu fo li so'e la'aru'e .i su'ovomei .ije la klaus. na cmima la remoi klesi .iku'i ledu'u la klaus. na co'e la remoi klesi cu nibli sei se dicra
ni'o suksa fa lenu ko'a trati .i da ca'o klama ti .i cadzu le fagyfesti poi bancu le cmana .i da mo .i ko'a troci lenu viska .i xadni .i lei xadni cu masno klama fo le fagyfesti .i ca'o klama ko'a .i la xendriks. sutra korcu gi'e lafmuvgau le cecla .i le xasne cu dirgo preja fi le kanla .i ko'a damba leza'i zenba leka xanka kei ca lenu lei xadni cu co'a jibni
ni'o le pamoi cu me la davyd. i dy. viska ko'a gi'e zenba leka sutra .i lei drata cu sutra jersi .i le remoi me la davyd. cu co'e .i le cimoi .i ci le me la davyd. noi simxu mintu cu klama ko'a .i smaji je to'e jarco .i lei cinla tuple cu slilu .i jgari le me la tedis. cribe .i ko'a fargau gi'e cecla .i le re lidne befi vu'i dy. cu spoja lei pulce .i le cimoi cu klama .ije da poi trixe cu go'i .i ri smaji cpare fi ko'a fe le grusi fagyfesti .i le me la selxai sonci .i galtu fi la davyd. ije trixe sei se dicra .ije ti'a la selxai sonci re la tasos. cu klama tai le gunma .i tilju befsri .i rusko jemna palku .i creka .i clani kerfa .i le slabu xadni cu mintu ko'u poi ko'a puzi viska .i zutse le snura stizu pe le marce .i re lo cinla je smaji xadni .i simxu mintu .i ty. mutce leka jibni .i la davyd. suksa korcu gi'e falcru le cribe .i le cribe cu sutra klama fo le loldi .i sekai leka zmiku kei le degji pe la xendriks. tagji le cabra .i le cribe cu canci .i spoja le bumru .i le re me la tasos. ca'o muvdu gi'e na'e jarco leka cinmo gi'e gunma cadzu mo'ipa'o le grusi fagyfesti .i pu'o lenu ta mo'u klama ko'a kei la xendriks. lafmuvgau le cmacelxa'i le midju gi'e cecla .i le re me la tasos. cu spoja .iku'i le cnino girzu cu klama fo le cmana .i vei mu bi'o xa la tasos. go'i .i lu'i ty. simxu mintu .i le linji gunma be ty. cu sutra klama ko'a
ni'o ko'a pu ba'o dunda fi ko'u le marce .e le sinxa .i ri'a tu'a ko'a la tasos. ca'o klama le lunra .i go'i le lunra jemyzda .i ko'u jai rinka leza'i cumki fa lenu go'i
ni'o ko'a drani tu'a le jbama goi ko'e .i ko'e se finti tedu'o su'o le drata klesi no'u le me la davyd. klesi .e le me la selxai sonci me'u klesi .iji'a la me la klaus. klesi .i se finti na'ebo lo remna .i ko'e se finti pa le lolni'a fanri secau ro lonu remna gasnu
ni'o le linji gunma be la tasos. cu jibni ko'a .i la xendriks. bregau vo'a gi'e panpi catlu ty. i le slabu flira .i le befsri .i le tilju creka .i le jbama noi se ke jundi lasna .i le jbama sei se dicra .i ca lenu lai tasos. snada ko'a kei le fanmo ranxi cu sidbo fi la xendriks. i ko'a zenba leka gleki kei ri'a lenu pensi ra .i le jbama .i se finti la remoi klesi fi lonu daspo le cmima be lei drata klesi .i se finti fi ra po'o .i lai jgalu co'a finti lo xarci lonu simxu damba
fa'o
Copyright note: As far as I know, Second Variety is in the public domain. The transcribers of the Project Gutenberg version state: “Extensive research did not uncover any evidence that the U.S. copyright on this publication was renewed.”
© 2024 Wolfgang Corcoran-Mathe. Released under the terms of the Creative Commons Attribution 4.0 International license.